Afriqadiki 16 dölet we bir teshkilatning xitayda turushluq diplomatliri Uyghur diyarida ziyarette bolghan

Muxbirimiz sada
2019-09-18
Élxet
Pikir
Share
Print

Burundi, uganda, lésoto, jenubiy afriqa, burkina faso, kon'go, mozambik, jibuti, sudan, zimbabwé we afriqa ittipaqi qatarliq 16 dölet we bir teshkilatning xitayda turushluq diplomatliri we ularning ayalliri xitay hökümitining teklipi bilen Uyghur diyarining ürümchi, turpan qatarliq jaylirini ziyaret qilghan.

Shinxu'a agéntliqining 18-séntebirdiki xewiridin melum bolushiche, déplomatlar awwal turpan shehiri idiqut rayonidiki kespiy téxnika terbiye merkizide ziyarette bolghan. Bu jeryanda ular xitay hökümiti yolgha qoyghan "Térrorluqqa qarshi küresh" ke yuqiri baha bérip, rayonda yéqinqi 3 yil ichide héchqandaq térrorluq hujumining yüz bermigenlikining del bu xil küreshning ijabiy rol oynighanliqidin bolghanliqini aghzi-aghzigha tegmey maxtighan. Shuning bilen bir waqitta ular yene "Xitay da'irilirining bu tirishchanliqliri ning natoghra idiye bilen yuqumlan'ghan yashlarni toghra yolgha bashlighanliqi" ni medhiyeligen.

Xewerde ilgiri sürülüshiche, 16 döletning diplomatliri yene ürümchidiki "Shinjang islam instituti" nimu közdin kechürgen. Mezkur institutning mudiri abdureqip tömürniyaz derisliklerning orunlashturulushi, "Oqughuchilar" ning xizmetke orunlishish ehwali qatarliq jehetlerde ulargha chüshenche bergen. Netijide déplomatlar xitay da'irilirining Uyghurlargha islam dinini öginish üchün ewzel shara'itlarni yaritip bergenlikige bolghan memnunluqini ipade qilghan hemde özliriningmu buningdin ülge alidighanliqini bildürgen.

Bu yil iyulda amérika hökümiti b d t kishilik hoquq aliy kéngishining Uyghur diyarining weziyiti heqqide saxta uchur bergüchiler üchün sehne hazirlap bergenlikini qattiq eyibligen idi. Emdilikte xitay hökümiti yene afriqadiki 16 dölet we bir teshkilatning diplomatlirini Uyghur diyarida ziyaret qildurushi xelq'araning diqqitini qozghidi.

Közetküchiler bu xitay hökümitining xel'arani aldash üchün nomussizlarche élip bériwatqan tetür teshwiqatining tipik bir misali, dep körsetmekte.

Toluq bet