Derhal dawalan'ghan eydiz yuqumdarlirida emeliy dawalash ünümi körülgen

Yéngidin élan qilin'ghan tetqiqat netijisige qarighanda, eydiz wirusi bilen yuqumlinipla derhal dawalan'ghan bir qisim kishilerde emeliy dawalash ünümi körülgen.

Fransiyediki alim - tetqiqatchilar eydiz wirusi bilen yuqumlan'ghandin kéyinla dawalan'ghan 14 bimar üstidin klinikiliq tekshürüsh élip barghan.

Netijide, bu kishiler eydizge qarshi dorilarni ishlitishtin toxtighan bolsimu, bularda 7 yilghiche eydiz wirusi qayta qozghilidighan ehwal körülmigen.

Amérikidiki CBS axbarat qanilining xewer qilishiche, mezkur tetqiqat netijisi fransiyede chiqidighan “Plos patogéns” ilmiy zhurnilida élan qilin'ghan.

Bu xewer amérika missisipi shtatida bir eydiz yuqumdari bowaqning tughulup, 30 sa'et ichide dawalash qobul qilghanliqi üchün eydizdin tamamen qutulghanliqi heqqidiki xewer élan qilinip, uzun ötmey otturigha chiqti.

Fransiyediki neker doxturxanisi we parizh deskartés uniwérsitéti proféssori kristine rozi'oks bu heqte toxtilip: bu bimarlarni derhal dawalash wirusning tereqqiyatini tizginligen bolushi, wirusning shekil özgertishini cheklep, immunitét sistémisining ünümlük inkas qayturush iqtidarini saqlap qalghan bolushi mumkin, dédi.

Uning bildürüshiche, bu bimarlardiki eydiz wirusi jughlanmilirining qisqirishi bu jehette emeliy dawalash ünümige érisheligenlikidin dérek béridiken.

Uyghur élimu xitay boyiche eydiz bilen yuqumlinish derijisi eng yuqiri rayonlarning biri. Bezi tetqiqatchilar Uyghurlardiki eydiz krizisining bu qeder yuqiri bolushida, eydizge sel qarash, ilmiy mu'amile qilmasliq, ümidsizlinip yoshurush qatarliq amillarningmu rol oynighanliqini körsetken idi.

Fransiyede bayqalghan bu bösüsh xaraktérlik dawalash netijisi Uyghur eydiz yuqumdarlirighimu ümid élip kelgüsi.