Alataw éghizidin xam néfit toshuydighan mexsus tömüryol liniyesi échilghan

“Xelq géziti” ning xewirige qarighanda, xitay hökümiti xam néfitke bolghan küchlük éhtiyajini qandurush üchün qazaqistan qatarliq orta asiya elliridin import qilidighan néfit miqdarini yenimu ashurghanliqi melum.

Igilinishiche, maytagh néfit - ximiye zawutining xam néfit iskilatidin alataw éghizigha biwasite tutushidighan bir mexsus tömüryol liniyesi 30 - iyul küni échilghan. Qazaqistandin import qiliniwatqan xam néfit bundin kéyin mezkur tömüryol liniyesi arqiliq biwasite toshulidiken.

Ilgiri qazaqistanning néfiti alataw éghizigha toshup kélin'gendin kéyin, bakqa qachilip tashyol arqiliq maytagh néfit ayrish zawutigha élip kélin'gen iken. Nöwette néfit toshuydighan mexsus liniyening alataw éghizigha tutashturulushi xitayning orta asiyadin import qilidighan xam néfit miqdarini yenimu ashuridiken.

Wal strét zhurnilining xewirige qarighanda, xitayning 7 - aydiki xam néfit importi köpeygen. Xunggo tamozhna bash mehkimisining 8 - awghust élan qilghan sanliq melumatta körsitilishiche, xitay 7 - ayda 31 milyon tonna néfit import qilghan bolup, künige texminen yette milyon 350 ming baktin toghra kelgen. Buni bulturqi oxshash mezgildikige sélishturghanda %12 ashqan.

Közetküchiler, 5 - awghust küni jang chünshyenning ürümchide xitay néfit we tebi'iy gaz guruhi shirkitining bash dériktori jang jyenxwani kütiwélishi xitayning Uyghur aptonom rayoni bilen uninggha qoshna orta asiya elliridiki néfit bayliqigha bolghan jiddiy éhtiyaji bilen munasiwetlik, dep hésablimaqta.