Alma shirkiti Uyghur rayonidin kiyim import qilghan

Muxbirimiz jewlan
2020.08.10

Alma shirkiti amérika hökümitining Uyghurlarni qul ishchi qilip ishletken xitay zawutlirining mallirini chekliginige qarimay, Uyghur rayonidin xizmet kiyimi import qilghan.

Bu ish, alma shirkitining bash diréktori tim kok bir hepte burun amérika dölet mejliside éytqan “Men shirketlerdiki mejburiy emgek yaki zamaniwi qulluqni eyibleymen” dégen sözidin bir hepte kéyin yüz bergen.

Awstraliye istratégiye we siyaset tetqiqati instituti (ASPI) bu yil 3-ayda doklat élan qilip, Uyghurlarni qul ishchi qilip ishlitish arqiliq dunyani mal bilen teminlewatqan xitay shirketlirini ashkarilighanidi.

Amérika hökümiti bu yil 7-ayda xong kong yida (Esquel) kiyim-kéchek guruhigha tewe sanji toqumichiliq zawuti we bashqa 10 xitay karxanisini Uyghur élidiki qul ishchi mesilisige chétishliqi bolghachqa chekligenidi.

Xewerde éytilishiche, alma shirkitining mezkur shirkettin kiyim import qilishi pochta uchurliri arqiliq melum bolghan. Xong kong yida kiyim-kéchek guruhi öz torida alma shirkitini “Asasliq xéridar” tizimlikige kirgüzgen bolup, bu tizimlik téxi yéqin'ghiche özgermigen.

Alma shirkitining bayanatchisi: “Yida guruhi alma shirkitining biwasite mal teminligüchisi emes. Mal teminligüchi shirkitimiz ishletken paxta ularning gu'angju we wiyétnamdiki zawutliridin kelgen” dégen. Biraq bu zawutlardiki paxtining nedin kelgenlikini ashkarilashni xalimighan. Gu'angju xitayning asasliq sheherliridin bolsimu, biraq u yerdin paxta chiqmaydu. Yida guruhining ashkara matériyalliridimu uning wiyétnamda paxtizarliqi barliqi heqqide héchqandaq melumat yoq iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.