«Алма» ширкити уйғурларниң мәҗбурий әмгикини чәкләйдиған қанун лайиһәси үчүн лобичилиқ қилған

Мухбиримиз ирадә
2020-10-29
Елхәт
Пикир
Share
Принт

Американиң «аксиюс» (Axios) хәвәрләр торидин мәлум болушичә, америкадики «алма» ширкитиниң америка дөләт мәҗлисидә елан қилинған уйғурларниң мәҗбурий әмгәккә селинишиға қарши туруш қанун лайиһәси үчүн лобичилиқ қилғанлиқи ашкариланған. Алма ширкити лобичилиқ үчүн башқа бир ширкәткә пул төлигән болуп, хәвәрдә «алма ширкитиниң бу қанунни қоллап лобичилиқ қилғанлиқи яки униңға қарши туруш үчүн лобичилиқ қилғанлиқи ениқ әмәс», дейилгән.

Һалбуки, алма ширкитиниң мәһсулатлири ишләпчиқирилидиған завутларда уйғурларниң мәҗбурий әмгәккә селиниватқанлиқи һәққидә илгири көп қетим ишәнчлик доклатлар елан қилинған. Мәсилән, австралийә истратегийә сиясәт институти бу йил 3-айда елан қилип зор ғулғула қозғиған доклатида, алма ширкитиниң компютер запчаслирини ясайдиған завутларда уйғурларниң мәҗбурий әмгәкчилириниң барлиқини ашкарилиған. Америка бирләшмә агентлиқиму хитайниң нәнчаң шәһиридә «алма» вә «лениво» қатарлиқ ширкәтләрниң компютер запчаслирини ясайдиған завутлирида уйғурларниң мәҗбурий әмгәккә селиниватқанлиқини ениқлап чиққан. Әмма алма ширкити 7-айдики бир инкасида өзлириниң нәнчаңдики «о-филим техникиси» шеркитини тәпсилий тәкшүргәнликини вә мәҗбурий әмгәк тоғрисида һечқандақ пакит тапалмиғанлиқини» ейтқан.

Америка дөләт мәҗлисиниң һәр икки партийәдин болған әзалири уйғурларниң мәҗбурий әмгәккә селиниш мәсилисигә қаттиқ көңүл бөлүватқан болуп, улар мәҗбурий әмгәк асасида ишләпчқириливатқан мәһсулатлириниң америка базириға киришиниң алдини елиш үчүн тәдбир қолланмақта. Нөвәттә дөләт мәҗлисидә уйғур мәҗбурий әмгикигә аит тонуштурулған икки қанун лайиһиси бар болуп, булар мақулланған тәқдирдә хитайдин мал тәминләватқан америка шеркәтлиригә малниң келиш мәнбәсини тәкшүрүш һәққидә йәниму еғир тәләпләр қоюлидикән.

Американиң амазон, алма, фейсбук вә гугул қатарлиқ 4 чоң гигант ширкитиниң иҗраийә әмәлдарлири(CEO) 29-июл күни америка дөләт мәҗлисидә юқириқи бу ширкәтләрниң һәқсиз риқабәт, учурни қамал қилиш, қолланғучи учурлирини қалаймиқан ишлитиш қатарлиқ бир қатар мәсилилири бойичә гуваһлиқ бәргәндә мәҗбурий әмгәк һәққидики соалларғиму дуч кәлгән.

Алма ширкитиниң баш иҗраийә әмәлдари тим кук шу йиғинда мәҗбурий әмгәкни һәргиз қоллимайдиғанлиқи һәққидә сөз қилған болсиму, уларниң бу һәқтә әмәлий тәдбир қоллинип-қолланмиғанлиқи ениқ әмәскән.

Пикирләр (0)
Share
Толуқ бәт