"Alma" shirkiti Uyghurlarning mejburiy emgikini chekleydighan qanun layihesi üchün lobichiliq qilghan

Muxbirimiz irade
2020-10-29
Élxet
Pikir
Share
Print

Amérikaning "Aksiyus" (Axios) xewerler toridin melum bolushiche, amérikadiki "Alma" shirkitining amérika dölet mejliside élan qilin'ghan Uyghurlarning mejburiy emgekke sélinishigha qarshi turush qanun layihesi üchün lobichiliq qilghanliqi ashkarilan'ghan. Alma shirkiti lobichiliq üchün bashqa bir shirketke pul töligen bolup, xewerde "Alma shirkitining bu qanunni qollap lobichiliq qilghanliqi yaki uninggha qarshi turush üchün lobichiliq qilghanliqi éniq emes", déyilgen.

Halbuki, alma shirkitining mehsulatliri ishlepchiqirilidighan zawutlarda Uyghurlarning mejburiy emgekke séliniwatqanliqi heqqide ilgiri köp qétim ishenchlik doklatlar élan qilin'ghan. Mesilen, awstraliye istratégiye siyaset instituti bu yil 3-ayda élan qilip zor ghulghula qozghighan doklatida, alma shirkitining kompyutér zapchaslirini yasaydighan zawutlarda Uyghurlarning mejburiy emgekchilirining barliqini ashkarilighan. Amérika birleshme agéntliqimu xitayning nenchang shehiride "Alma" we "Léniwo" qatarliq shirketlerning kompyutér zapchaslirini yasaydighan zawutlirida Uyghurlarning mejburiy emgekke séliniwatqanliqini éniqlap chiqqan. Emma alma shirkiti 7-aydiki bir inkasida özlirining nenchangdiki "O-filim téxnikisi" shérkitini tepsiliy tekshürgenlikini we mejburiy emgek toghrisida héchqandaq pakit tapalmighanliqini" éytqan.

Amérika dölet mejlisining her ikki partiyedin bolghan ezaliri Uyghurlarning mejburiy emgekke sélinish mesilisige qattiq köngül bölüwatqan bolup, ular mejburiy emgek asasida ishlepchqiriliwatqan mehsulatlirining amérika bazirigha kirishining aldini élish üchün tedbir qollanmaqta. Nöwette dölet mejliside Uyghur mejburiy emgikige a'it tonushturulghan ikki qanun layihisi bar bolup, bular maqullan'ghan teqdirde xitaydin mal teminlewatqan amérika shérketlirige malning kélish menbesini tekshürüsh heqqide yenimu éghir telepler qoyulidiken.

Amérikaning amazon, alma, féysbuk we gugul qatarliq 4 chong gigant shirkitining ijra'iye emeldarliri(CEO) 29-iyul küni amérika dölet mejliside yuqiriqi bu shirketlerning heqsiz riqabet, uchurni qamal qilish, qollan'ghuchi uchurlirini qalaymiqan ishlitish qatarliq bir qatar mesililiri boyiche guwahliq bergende mejburiy emgek heqqidiki so'allarghimu duch kelgen.

Alma shirkitining bash ijra'iye emeldari tim kuk shu yighinda mejburiy emgekni hergiz qollimaydighanliqi heqqide söz qilghan bolsimu, ularning bu heqte emeliy tedbir qollinip-qollanmighanliqi éniq emesken.

Toluq bet