Almata shehiridiki Uyghur gimnaziyesi almata shehiridiki eng yaxshi 10 mektep qataridin orun alghan

Qazaqistanning kona paytexti almata shehirige jaylashqan abdulla rozibaqiyéf namidiki 153-Uyghur gimnaziyesi, yeni toluq ottura mektipi almata shehiridiki eng yaxshi 10 mektep qataridin orun alghan.Qazaqistanning jumhuriyetlik “Uyghur awazi” gézitining xewer qilishiche, mezkur Uyghur toluq ottura mektipi nopusi bir milyon 720 mingdin artuq almata shehiridiki 210 mektep ichidiki eng ilghar 10 mektep tizimlikige shuningdek birleshken döletler teshkilati pen-ma'arip we medeniyet teshkilati terkibidiki mektepler qatarigha kirgüzülgen. Mezkur mektepning Uyghur oqughuchiliri ilgiri-kéyin shuningdek birleshken döletler teshkilati pen-ma'arip we medeniyet teshkilati we yawropa bixeterlik we hemkarliq teshkilati, “Turan-juni'or” we bashqa xelq'araliq organlar teripidin uyushturulghan ilmi musabiqe hem pa'aliyetlerge aktip qatniship körünerlik netijiler qazan'ghan. Mezkur gimnaziye mudiri shawket ömerof qazaqistan jumhuriyiti teripidin “Hörmet” ordéni bilen teqdirlen'gen.

Buningdin bashqa almata shehiridiki yene bir Uyghur gimnaziyesi, yeni mesim yaqupof namidiki 101-gimnaziye mektipimu kéyinki besh yil ichide almata shehiridiki eng yaxshi 10 mektep qataridin orun alghan. Igilishimizche, mezkur ikki Uyghur gimaniziyeside pütün dersler Uyghur tilida ötülidighan bolup, Uyghur mu'ellimler barliq penlerni Uyghur tilida sözleydu. Oqughuchilar, yene qazaq, rus, in'gliz tillirinimu öginidu. Qazaqistandiki pütün Uyghur mekteplirining Uyghur tilidiki derslikliri qazaqistan hökümitining meblighi bilen muntizim halda her yili dégüdek neshr qilinip turmaqta.

Qazaqistan hökümet sanliq melumatlirigha asaslan'ghanda, almata shehiride 85 mingdin artuq Uyghur yashaydighan bolup, almata shehiride qazaqlar, ruslardin qalsa Uyghurlar nopus jehette üchinchi orunda turidiken. Pütün qazaqistanda 250 etrapida Uyghur yashaydu. Emma Uyghurlar öz sanini buningdin köprek hésablaydu.