Америка: хитайниң америка хәзинә чекини төкмә қилип сетишидин әнсиримәймиз

Мухбиримиз әркин
2018.05.01

Америка малийә министири мнучин хитайниң қолидики америка хәзинә чекини төкмә қилип сетип, америкидин өч елишидин әндишә қилмайдиғанлиқини билдүргән. С н н ниң хәвәр қилишичә, мнучин дүшәнбә күни америка хәзинә чекиниң капаләткә игә “дунядики әң сағлам” хәзинә чеки икәнликини әскәртип, униң базириниң “интайин күчлүк” икәнликини тәкитлигән.

Хитай дунядики америка хәзинә чекини әң көп сетивалған дөләт болуп, униң қолида бир тирилйон 180 милярд долларлиқ америка хәзинә чеки бар. У йеқинда, әгәр америка билән сода уруши башлинип қалса, униң қолидики хәзинә чекини төкмә қилип сетиштин янмайдиғанлиқини илгири сүргән.

Хитайниң америкида турушлуқ баш әлчиси суй тйәнкәй бу йил ‏-3айда америка блумберг телевизийә қанилиниң зияритини қобул қилип, сода уруши партлап қалса, америка хәзинә чекини ойлишидиғанлиқини билдүргән. У, “биз һәр хил еһтималлиқларни қарап чиқимиз” дегән иди. Лекин с н н ниң хәвиридә тәкитлинишичә, хитайниң америка хәзинә чекини төкмә қилип сетишқа тәвәккүл қилиши муқәррәр әмәскән. Хәвәрдә мутәхәссисләрниң сөзи нәқил кәлтүрүлүп, әгәр хитай бу йолни таллиса буниң хитай һөкүмитигә у халимайдиған ақивәтләрни елип келидиғанлиқи билдүрүлгән. Хәвәрдә қәйт қилинишичә, хитай америка хәзинә чекини төкмә қилип сатса униң қолидики хәзинә чекиниң қиммити чүшидикән шундақла бу хәлқ пулиниң доллар алдидики қиммитини тәвритиветидикән. 

Мнучин башчилиқидики бир америка сода вәкилләр өмики пәйшәнбә күни бейҗиңға берип, хитай билән сода сөһбити өткүзиду. Мнучин юқири сөзләрни сода вәкилләр өмики йолға чиқиш алдида тәкитлигән. Мнучинниң билдүрүшичә, америка сода өмики америкиниң хитай билән болған содисидики қизил рәқәм вә әқлий мүлк һоқуқиға алақидар бир қатар мәсилиләрни һәл қилишни тәләп қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.