Америка дөләт ишлири министири үч асия дөлитини зиярәт қилиду

Мухбиримиз ирадә
2017.03.08
Share on WhatsApp
Share on WhatsApp

Америка дөләт ишлири министири рекс тиллерсон 3-айниң 15-күнидин 19-күнигичә японийә, җәнубий корейә вә хитайда рәсмий зиярәттә болидикән. Бу униң вәзипигә олтурғандин буянқи асия-тинч окян дөләтлиригә қаратқан тунҗи зиярити болуп һесаблиниду.

Америка дөләт ишлири министирлиқиниң баянатчиси марк тонерниң бу һәқтики баянатидин қариғанда, рекс тиллерсон өзиниң юқиридики бу дөләтләрдики зиярити җәрянида, бир қисим юқири дәриҗилик рәһбәрләр билән учришип, америкиниң бу дөләтләр билән болған мунасивәтлири, истратегийәлик һәмкарлиқлар, шималий корейәниң ядро тәһдитигә қарши туруш вә америкиниң асия-тинч окян районидики иқтисадий һәм бихәтәрлик мәнпәәтлирини капаләткә игә қилишқа мунасивәтлик хәлқаралиқ қанунларни күчәйтиш қатарлиқ темиларда сөһбәт елип баридикән.

Мәлум болушичә, униң хитайға қилидиған зиярити хәлқарадики кишилик һоқуқ паалийәтчилириниң диққитини қозғаватқан болуп, бир қисим көзәткүчиләр рекс тиллерсон әпәндигә тивиттер тори арқилиқ қилған чақириқлирида, униңдин хитайдики зиярити давамида чоқум кишилик һоқуқ мәсилисини оттуриға қоюшни, хитай һөкүмитиниң мәҗбурий иқрар қилдуруш һәрикити қатарлиқ кишилик һоқуқ актиплириға қиливатқан бесимлирини сүрүштә қилишни тәләп қилди.

Америка авазиниң хәвәр қилишичә,рекс тиллерсон хитай зияритидә хитай дөләт рәиси ши җинпиң биләнму көрүшидикән.

Америка уйғур бирләшмиси рәиси илшат һәсән әпәндиму кишилик һоқуқниң америкиниң әң асасий қиммәт қариши икәнликини әскәртип туруп, “рекс тиллерсон әпәнди америкиниң бу әнәнисини давамлаштуруп, уйғурларниң мәсилисигә көңүл бөлүши керәк” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.