Amérika dölet mudapi'e ministiri sherqiy jenubiy asiyada muhim ziyaretlerde boldi

Muxbirimiz eziz
2021-07-27
Share

Amérika-xitay munasiwitidiki yiriklikning téximu chongqurlaydighanliqi amérika tashqi ishlar ministirliqining mu'awin ministiri wéndi shérman xanimning 25-iyuldiki xitay ziyaritide yene bir qétim namayan boldi. Del shu waqitlarda amérika dölet mudapi'e ministiri loyd astin ependi sherqiy jenubiy asiya elliride resmiy xizmet ziyaritini bashlidi.

Roytérs agéntliqining 27-iyuldiki xewiride éytilishiche, général loyd astin hazirghiche baydin hökümitining sherqiy jenubiy asiyagha ewetken tunji kabinét ezasi iken. U bu qétimqi seperde amérika hökümitining xitaygha taqabil turush istiratégiyesi üchün bekmu muhim bolghan bir qisim döletler bilen, jümlidin wiyétnam, sin'gapor we filippin qatarliqlar bilen munasiwetlik hemkarliq ishlirini muhakime qilidiken.

Xewerde éytilishiche, baydin hökümiti hakimiyet béshigha chiqqandin buyan sherqiy jenubiy asiya elliri amérika hökümiti tekitlep kéliwatqan hindi-tinch okyan rayonigha da'ir iqtisadiy, soda we herbiy hemkarliqning emelge éshishini kütüwatqan iken. Mu'awin tashqi ishlar ministiri wéndi shérman xanimning xitay sepirining netijisiz axirlishishigha ülgürüp otturigha chiqqan bu ziyaret her sahening diqqitini tartqan. Général astin bu heqte söz qilip "Bu qétim biz hemkarliq we shériklik mesiliside köpligen söhbetlerde bolmaqchimiz. Bizning meqsitimiz öz'ara alaqini kücheytish" dégen.

Xitay hökümitining jenubiy xitay déngizi tewesidiki zomigerliki we tehditlik heriketliri sherqiy jenubiy asiya ellirini izchil endishige séliwatqanda amérika dölet mudapi'e ministirining bu jaygha ziyaretke kélishi hemde bu döletler bilen qoyuq hemkarliq munasiwiti ornatmaqchi bolghanliqi bu rayondiki hemmila döletni xushal qilghan.

Melum bolushiche, xuddi shu waqitning özide amérika tashqi ishlar ministiri antoni bilinkin hindistan'gha xizmet ziyaritige kelgen. Hindistan bolsa amérika hökümitining xitaygha taqabil turushtiki yene bir zor ittipaqdishi, dep qariliwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet