Америка бу йил мартта вийетнамға авияматка әвәтидиғанлиқини җакарлиди

Мухбиримиз ирадә
2018-01-25
Share

Игилинишичә, америка бу йил март ейида вийетнамға авияматка әвәтмәкчи икән. Ройтерс агентлиқиниң хәвәр қилишичә, бүгүн америка-вийетнам һәр иккила тәрәп бу хәвәрниң тоғрилиқини җәзмләштүргән. Көзәткүчиләрниң билдүрүшичә, бу вийетнам урушидин кейин икки дөләт һәрбий мунасивәтлириниң күнсайин чоңқурлишиватқанлиқиниң рошән бир ипадиси болуп һесаблинидикән.

Мәлум болушичә, бу қарар америка дөләт мудапиә министири җим маттисниң вийетнам пайтәхти ханойда елип барған икки күнлүк зиярити мәзгилидә елан қилинған. Һәр икки тәрәп, бу қетимлиқ учришишиниң муһим нуқтисини хитайниң җәнубий деңиздики җиддий кеңәймичиликигә қаратқан икән.

Вийетнам дөләт мудапиә министирлиқиниң бу һәқтики баянатида, америка авияматкисиниң вийетнамдики мәркизи порт болған данаң портиға келидиғанлиқи билдүрүлгән.

Ройтерс агентлиқиниң билдүрүшичә, америка авияматкисиниң вийетнамға келиши хитайниң һәрбий кеңәймичиликидин әнсирәватқан, болупму униң җәнубий деңизниң игилик һоқуқ мәсилисидики муштумзорлуқидин нарази болуватқан дөләтләрни мәмнун қилидикән. Бу сәвәблик америка, австралийә, һиндистан вә японийә қатарлиқ 4 дөләт өз-ара һәмкарлиқ орнатқандин сирт, улар йәнә вийетнам билән болған һәрбий алақисиниму күчәйтмәктикән.

Америка авияматкисиниң данаң портиға қилидиған зиярити бир қанчә айлиқ дипломатик учришишларниң нәтиҗиси болуп, икки дөләт һәрбий мунасивәтлириниң бу хил тәрәққиятиға түрткә болған асаслиқ амил-дәл хитайниң райондики һәрбий кеңәймичилики кәлтүрүп чиқарған җиддийчилик икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт