Австралийә-америка рәһбәрлириниң учришишидики муһим тема-хитай вә район бихәтәрлики

Мухбиримиз ирадә
2018-02-22
Елхәт
Пикир
Share
Принт

Ройтерс агентлиқиниң хәвәр қилишичә, америка президенти доналд трамп билән австралийә баш министири малколм тернбол иккисиниң учришишидики муһим күн тәртипләр хитайниң зорийиватқан тәсир күчи вә «тинч окян иқтисад келишими» ни әслигә кәлтүрүштин ибарәт икән.

Трамп билән тернбол мушу шәнбә күни вашингтонда учришидикән. Австралийәниң исмини ашкарилашни халимиған бир әмәлдари пәйшәнбә күни қилған сөзидә, австралийә баш министириниң наһайити зор һәйәт билән америкиға баридиғанлиқи, икки тәрәпниң сода алақилирини күчәйтиш тоғрисида сөһбәтләрни өткүзидиғанлиқи вә әлвәттә хитай вә район бихәтәрлик мәсилисиниң икки тәрәп сөһбитидики муһим темиларниң бири болидиғанлиқини билдүргән

Йеқиндин буян, хитайниң австралийә сиясий саһәсигә түрлүк усуллар билән тәсир көрситиши вә шундақла австралийәдики пикир вә мәтбуат әркинликигә қоюватқан чәклимилири диққәт қозғап, австралийәдә күчлүк муназирә пәйда қилған иди.

Австралийә баш министири тернбол өткән декабирда австралийә һөкүмитиниң хитайниң сиясий тәсиригә қарши күрәш қилиш үчүн бәзи йеңи қанунларни йолға қойидиғанлиқини җакарлиған иди.

Америка президенти доналд трампму бу айниң бешида хитайниң һәрбий кеңәймичиликини очуқ-ашкара тәнқид қилип келиватқан америка тинч окян һәрбий қоманданлиқ штабиниң қомандани һаррий һаррисни америкиниң австралийәдики баш әлчиси қилип тәйинлигән.

Юқиридики бу австралийәлик әмәлдарниң сөзидин қариғанда, австралийә баш министири бу учришишта йәнә америка президенти трампни әйни вақитта чекинип чиқип кәткән вә хитайни ялғуз қоюш үчүн қурулғанлиқи илгири сүрүлидиған «тинч окян иқтисад келишими» гә қайтип келишкә дәвәт қилиши мумкин икән.

Пикирләр (0)
Share
Толуқ бәт