Awstraliye-amérika rehberlirining uchrishishidiki muhim téma-xitay we rayon bixeterliki

Muxbirimiz irade
2018-02-22
Élxet
Pikir
Share
Print

Roytérs agéntliqining xewer qilishiche, amérika prézidénti donald tramp bilen awstraliye bash ministiri malkolm térnbol ikkisining uchrishishidiki muhim kün tertipler xitayning zoriyiwatqan tesir küchi we "Tinch okyan iqtisad kélishimi" ni eslige keltürüshtin ibaret iken.

Tramp bilen térnbol mushu shenbe küni washin'gtonda uchrishidiken. Awstraliyening ismini ashkarilashni xalimighan bir emeldari peyshenbe küni qilghan sözide, awstraliye bash ministirining nahayiti zor hey'et bilen amérikigha baridighanliqi, ikki terepning soda alaqilirini kücheytish toghrisida söhbetlerni ötküzidighanliqi we elwette xitay we rayon bixeterlik mesilisining ikki terep söhbitidiki muhim témilarning biri bolidighanliqini bildürgen

Yéqindin buyan, xitayning awstraliye siyasiy sahesige türlük usullar bilen tesir körsitishi we shundaqla awstraliyediki pikir we metbu'at erkinlikige qoyuwatqan cheklimiliri diqqet qozghap, awstraliyede küchlük munazire peyda qilghan idi.

Awstraliye bash ministiri térnbol ötken dékabirda awstraliye hökümitining xitayning siyasiy tesirige qarshi küresh qilish üchün bezi yéngi qanunlarni yolgha qoyidighanliqini jakarlighan idi.

Amérika prézidénti donald trampmu bu ayning béshida xitayning herbiy kéngeymichilikini ochuq-ashkara tenqid qilip kéliwatqan amérika tinch okyan herbiy qomandanliq shtabining qomandani harriy harrisni amérikining awstraliyediki bash elchisi qilip teyinligen.

Yuqiridiki bu awstraliyelik emeldarning sözidin qarighanda, awstraliye bash ministiri bu uchrishishta yene amérika prézidénti trampni eyni waqitta chékinip chiqip ketken we xitayni yalghuz qoyush üchün qurulghanliqi ilgiri sürülidighan "Tinch okyan iqtisad kélishimi" ge qaytip kélishke dewet qilishi mumkin iken.

Toluq bet