Amérika hökümiti kanada bilen méksikagha Uyghur mejburiy emgiki bilen yasalghan mehsulatlarni import qilishni toxtitish toghrisida bésim qilghan

Muxbirimiz erkin
2022.07.11
Share on WhatsApp
Share on WhatsApp

Amérika özining shimaliy amérikadiki ikki muhim qoshnisi we iqtisadiy shériki bolghan kanada bilen méksikagha xitayning Uyghur mejburiy emgikide ishlepchiqirilghan mehsulatlirini import qilishni toxtitish toghrisida bésim qilghan.

Kanadadiki “Yer shari we pochta” gézitining xewer qilishiche, amérika soda wekili katérin tay 8-iyul küni kanada soda ministiri mariy éng, méksika iqtisad ministiri tatiyana klozéwr karillo bilen söhbet ötküzüp, shimaliy amérika erkin soda kélishimini muzakire qilghan. U söhbette Uyghur mejburiy emgiki bilen ishlepchiqirilghan xitay mehsulatlirini import qilishni toxtitishni otturigha qoyghan.

Katérin tay ötken jüme küni “Yer shari we pochta” gézitining zyaritini qobul qilghanda mezkur söhbet heqqide mexsus toxtalghan. U söhbette xitay mesilisining, bolupmu Uyghur mejburiy emgiki we teminlesh zenjiride xitaygha tayinip qélish mesilisining zor salmaqni teshkil qilghanliqini éytqan. Katérin tay mundaq digen: “Bu mesile söhbitimizning nahayiti zor salmiqini teshkil qildi… mejburiy emgek xitay bilen bolghan sodidiki yitük mesile emes, lékin bu shinjangdiki Uyghur ahalisige tutqan mu'amilini, shundaqla xitaydiki omumi weziyetni nezerde tutqanda, intayin muhim mesile.”

Amérika, kanada we méksika arisidiki erkin soda kélishimi mejburiy emgekni cheklesh, emgek hoquqi we we muhitni qoghdashqa a'it küchlük mezmunlarni öz ichige alghan bolsimu, biraq kanada mejburiy emgek mehsulatlirining import qilinishini chekleshte héchqandaq tedbir qollanmasliq bilen eyiblinip kelgen.

Yéqinda “Kanada ‍uyghur heqlirini qoghdash qurulushi” ning diréktori memet toxti “Toronto yultuzi” gézitide maqale élan qilip, “Kanadaning Uyghur mejburiy emgek mehsulatlirini tökme qilip sétish meydanigha aylinip qalghanliqi” ni ilgiri sürgen. “Yer shari we pochta” gézitining éytishiche, katérin tay yene mundaq dégen: “Biz peqetla kanadani menbe qilghan quyash énérgiyesi taxtilirining kirishige yol qoyuwatimiz… her ikki terepning bashqa jaylardin naheq ishlepchiqirilip yaki naheq sétiwélinip kélin'gen quyash énirgiye taxtilirining, bolupmu xitaydin kelgen, dunya quyash énirgiye taxtisining 85 pirsentini teshkil qilidighan énirgiye taxtilirigha arqa ishik bolup bermeslik toghrisida ehdimiz bar.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.