Amérika dölet mejlisi ezaliri xet yézip, mejburiy emgek mallirining kanadadin kirishini tosmaqchi bolghan

Amérika dölet mejlisi ezaliri “Uyghur mejburiy emgikining aldini élish qanuni” gha xilapliq qilish xetiri bolghan yochuqlarni waqtida bayqap, uninggha qarshi tedbir almaqta iken.

Kanadaning “Byuro” (The Bureau) tori 24-séntebir élan qilghan xewerge qarighanda, amérika dölet mejlisi kéngesh palata ezasi marko robiyo bilen jéf mérkili (Jeff Merkley) kanada soda ministiri mariy nig (Mary Ng) gha xet yézip, kanadaning hazir xitayning Uyghur rayonidiki mejburiy emgek mallirini amérikagha éksport qilidighan arqa derwazisi bolup qalghanliqini bildürgen.

Amérika dölet mejlisi ezaliri bu xétide, kanadaning qanun ijra qilish organliridin ümidsizlen'genlikini bildürgen, chünki bu organlar xitayning kishilik hoquqni depsende qilishqa chétishliq mallirini shimaliy amérika bazirigha kirishige yol qoyghan. Buning bir misali shuki, amérika “Uyghur mejburiy emgikining aldini élish qanuni” boyiche chekligen xitayning küntaxta mehsulatliri kanada arqiliq amérikagha kirishke bashlighan, emma amérika tamozhnasi ularni tosuwalghan.

Xewerlerdin melum bolushiche, xitay hazir amérika-kanada-méksika soda kélishimi (shimali amérika soda kélishimi depmu atilidu) din paydilinip, tömür mehsulatlirini méksikada ishlep amérikagha éksport qilishqa urunuwatqan bolsa, mejburiy emgek mallirini kanada arqiliq amérika bazirigha kirgüzüshke urunmaqta iken.

Amérika kéngesh palata ezasi jéf mérkili 24-séntebir özining tor bétide bergen bayanatida, amérika dölet mejlisi hem uning xitay ishliri komitétidiki 4 ezaning amérika, kanada we méksika soda wekillerge xet yézip, bu üch döletning “Amérika-kanada-méksika soda kélishimi” ge qet'iy emel qilip, xitaydin kéliwatqan mejburiy emgek mallirini chekleshni, yeni bu üch dölettin birige kelgen mejburiy emgek mallirining bashqa döletke bérip qélishining aldini élishni, bu jehettiki hemkarliqni kücheytishni telep qilghanliqini bildürgen.