Америка һөкүмити хитайға йәниму көп екиспорт чәклимиси қоюшқа тәйярланмақта

Мухбиримиз ирадә
2022.07.07
Share on WhatsApp
Share on WhatsApp

Америка һөкүмити хитайға йәниму көп екиспорт чәклимиси қоюшқа тәйярланмақтикән.

“ню-йорк вақти гезити” ниң америка һөкүмитиниң бир қиисм әмәлдарлири вә сабиқ әмәлдарлиридин игилишичә, америка һөкүмити русийәниң украинаға қозғиған таҗавузчилиқ урушидин йәкүнлигән савақларға асасән, хитайниң америка дөләт хәвпсизликигә тәһдит селиш еһтималлиқи вә униң барғансери начарлишиватқан кишилик һоқуқ хатирисини нәзәрдә тутуп туруп, хитайға йәниму көп екиспорт чәклимиси қоюшқа тәйярланмақтикән.

Мәлум болушичә, америка һөкүмитиниң бу тиришчанлиқи Експорт контроллуқи йолға қоюлидиған әһвалларни кеңәйтишни, буни шерик дөләтләрдиму өзләштүрүшни, қайси техникиларниң сәзгүр яки һалқилиқ техника дәп қарилидиғанлиқини қайтидин изаһлап чиқишни өз ичигә алидикән.

Хәвәрдә ейтилишичә, бу қетим америка һөкүмити йеңи вә сәзгүр техникиларни хитайға екиспорт қилишта пәқәт униң һәрбий ишларға ишлитилишидәк хәвпнила ойлишип қалмай, бәлки бундақ техникиларниң хитай һөкүмити тәрипидин уйғурлар вә тибәтләрни бастурушта вә мәҗбурий әмгәк сияситини йолға қоюшта ишлитилишиниң алдини елишни мәқсәт қилған икән.

Америка сода министирлиқи санаәт вә бихәтәрлик башқармисиниң башлиқи алан ф. Естевәз (Alan F. Estevez) Мундақ дегән: “хитайниң техника саһәсидә техиму таҗавузчи, техиму кәскин вә техиму актип болушиға әгишип, бизниң експортни контрол қилишимизниң әһмийити техиму ашти. Биз американиң техника җәһәттики артуқчилиқини сақлап қелишиға капаләтлик қилишимиз керәк... Бизниң нишанимиз хитайниң бизниң техникилиримизни ишлитип, өзиниң һәрбий иқтидарини тәрәққий қилдурушиниң алдини елиштн ибарәт...”

“ню-йорк вақти гезити” сөзләшкән башқа мунасивәтлик әмәлдарларму, америка һөкүмитиниң хитайниң һәрбий тәрәққиятиға пайдилиқ техникиларниң хитайға екиспорт қилинишиниң алдини елиш үчүн екиспорт чәклимисиниң даирисини кеңәйтмәкчи болуватқанлиқини, хитайниң бундақ техникиларға еришишини чәкләш арқилиқ қораллиқ тоқунушниң алдини алғили болидиғанлиқини билдүргән.  

“ню-йорк вақти гезити” ниң ейтишичә, президент байден вә униң ярдәмчилири хитайни “американиң әң узун муддәтлик риқабәтчиси” дәп атаватқан болуп, улар хитай тәһдитиниң алиқачан русийәни ешип чүшкәнликигә ишинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.