Amérika hökümiti xitaygha yenimu köp ékisport cheklimisi qoyushqa teyyarlanmaqta

Muxbirimiz irade
2022.07.07

Amérika hökümiti xitaygha yenimu köp ékisport cheklimisi qoyushqa teyyarlanmaqtiken.

“Nyu-york waqti géziti” ning amérika hökümitining bir qi'ism emeldarliri we sabiq emeldarliridin igilishiche, amérika hökümiti rusiyening ukra'inagha qozghighan tajawuzchiliq urushidin yekünligen sawaqlargha asasen, xitayning amérika dölet xewpsizlikige tehdit sélish éhtimalliqi we uning barghanséri nacharlishiwatqan kishilik hoquq xatirisini nezerde tutup turup, xitaygha yenimu köp ékisport cheklimisi qoyushqa teyyarlanmaqtiken.

Melum bolushiche, amérika hökümitining bu tirishchanliqi Éksport kontrolluqi yolgha qoyulidighan ehwallarni kéngeytishni, buni shérik döletlerdimu özleshtürüshni, qaysi téxnikilarning sezgür yaki halqiliq téxnika dep qarilidighanliqini qaytidin izahlap chiqishni öz ichige alidiken.

Xewerde éytilishiche, bu qétim amérika hökümiti yéngi we sezgür téxnikilarni xitaygha ékisport qilishta peqet uning herbiy ishlargha ishlitilishidek xewpnila oyliship qalmay, belki bundaq téxnikilarning xitay hökümiti teripidin Uyghurlar we tibetlerni basturushta we mejburiy emgek siyasitini yolgha qoyushta ishlitilishining aldini élishni meqset qilghan iken.

Amérika soda ministirliqi sana'et we bixeterlik bashqarmisining bashliqi alan f. Éstéwez (Alan F. Estevez) Mundaq dégen: “Xitayning téxnika saheside téximu tajawuzchi, téximu keskin we téximu aktip bolushigha egiship, bizning éksportni kontrol qilishimizning ehmiyiti téximu ashti. Biz amérikaning téxnika jehettiki artuqchiliqini saqlap qélishigha kapaletlik qilishimiz kérek... Bizning nishanimiz xitayning bizning téxnikilirimizni ishlitip, özining herbiy iqtidarini tereqqiy qildurushining aldini élishtn ibaret...”

“Nyu-york waqti géziti” sözleshken bashqa munasiwetlik emeldarlarmu, amérika hökümitining xitayning herbiy tereqqiyatigha paydiliq téxnikilarning xitaygha ékisport qilinishining aldini élish üchün ékisport cheklimisining da'irisini kéngeytmekchi boluwatqanliqini, xitayning bundaq téxnikilargha érishishini cheklesh arqiliq qoralliq toqunushning aldini alghili bolidighanliqini bildürgen.  

“Nyu-york waqti géziti” ning éytishiche, prézidént baydén we uning yardemchiliri xitayni “Amérikaning eng uzun muddetlik riqabetchisi” dep atawatqan bolup, ular xitay tehditining aliqachan rusiyeni éship chüshkenlikige ishinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.