Америка әлчисиниң уйғур ели зиярити кечикип хәвәр қилинди

Америкиниң хитайда турушлуқ баш әлчиси гәрий лок 24 - - април күни уйғур елиниң мәркизи үрүмчидә ечилған ениргийә һәмкарлиқ йиғиниға қатнашқан.

Униң бу зияритигә америкиниң хитайда турушлуқ әлчихана хадимлири вә америкидики 30 ға йеқин чоң шеркәтләрниң вәкиллири бирликтә иштирак қилған. Әмма қизиқарлиқи, хитайдики хәвәр мәнбәлири гәрий локниң уйғур ели зиярити һәққидики хәвәрни 24 - чесла йиғин аяқлишип болғандин кейин йәни бир күн кечикип елан қилғандин сирт, униң зияритиниң қанчә күн давам қилидиғанлиқиниму тилға алмиди.

Бу қетимқи зиярәт америка баш әлчиси гәрий локниң уйғур елини тунҗи қетим зиярәт қилғанлиқи болуп һесаблиниду.

Җоңго хәвәрләр торида чиққан хәвәрдә ейтилишичә, гәрий лок зиярити давамида уйғур елиниң партком секритари җаң чүншйән билән көрүшкән. Икки тәрәп һәмкарлиқни ашуруш тоғрисида сөһбәтләшкән.

Америка әлчиси гәрий лок хитайниң кишилик һоқуқ вәзийитини наһайити кәскин тәнқид қилиш билән тонулған бир шәхс. Гәри лок өткән йили 10 - айда тибәтни зиярәт қилғандин кейин хитай һөкүмитини тибәтләрниң дәрдигә қулақ селишқа, өзини көйдүрүшигә сәвәб болуватқан амиллар үстидә сөһбәт өткүзүшкә чақирған иди.