Бейҗиңдики америка әлчиханиси уйғурларға рамизанлиқ тиләк йоллиди

Мухбиримиз әзиз
2018.05.18
Share on WhatsApp
Share on WhatsApp

Уйғурлар дияридики сиясий бастурушларниң бир муһим ипадиси һәр йилқи рамизан ейи мәзгилидә хитай һөкүмити қаттиқ қоллуқ билән иҗра қилип келиватқан рамизан чәклимисигә мәнсуп бәлгилимиләрдә ипадилинип келиватқанлиқи мәлум.

Бу йилму уйғурлар дияридики ислам диниға етиқад қилидиған мусулманларниң рамизан мәзгилидики диний паалийәтлирини қаттиқ чәкләш һәққидә буйруқ вә бәлгилимиләрниң болғанлиқи, җүмлидин рамизан розиси тутушниң өзила “тәрбийәләш мәркизи”гә беришқа йетип ашқудәк сәвәб болидиғанлиқи һәққидә түрлүк учурлар тарқалмақта.

Уйғурлар дияридики рамизанлиқ чәклимиси қаттиқ әйиблиниватқан, әмма уйғурлар диярида рамизан розиси һәққидә сөз қилишқиму имкан болмайватқан әһвалда бейҗиңдики америка әлчиханиси өзиниң тор бетидә хитайчә вә уйғурчә йезиқларда рамизанлиқ тиләк елан қилған. Баш әлчи бранстад намидин елан қилинған бу тиләктә улар өзлириниң барлиқ мусулманларға қизғин салам йоллайдиғанлиқини билдүрүп: “мән бизниң охшимиған мәдәнийәт вә етиқадни һөрмәтләштин вә охшимиған етиқади болуш һоқуқини қоғдаштин қандақ нәтиҗиләргә ершәләйдиғанлиқимиз тоғрулуқ ойлинип көрүшимизни үмид қилимән. Рамизан мубарәк!” дәйду.

Д у қ му уйғурлар рамизан ейида дуч келиватқан диний бесимлар һәққидә сөз қилип, 16-май күни “шәрқий түркистандики рамизан чәклимилири” сәрләвһилик баянат елан қилди. Баянатта хитай һөкүмитиниң йиллардин буян һөкүмәт хизмәтчилири, оқуғучилар вә оқутқучиларни рамизандин чәкләп келиватқанлиқи, әмдиликтә болса “бир аилә болуш” намида һәр бир уйғур аилисигә бир яки бирнәччидин хитай кадирни йетип-қопушқа орунлаштуруп, рамизанлиқ паалийәтләрни өйләргичә назарәт қиливатқанлиқи әйибләнгән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.