Béyjingdiki amérika elchixanisi Uyghurlargha ramizanliq tilek yollidi

Muxbirimiz eziz
2018.05.18
Share on WhatsApp
Share on WhatsApp

Uyghurlar diyaridiki siyasiy basturushlarning bir muhim ipadisi her yilqi ramizan éyi mezgilide xitay hökümiti qattiq qolluq bilen ijra qilip kéliwatqan ramizan cheklimisige mensup belgilimilerde ipadilinip kéliwatqanliqi melum.

Bu yilmu Uyghurlar diyaridiki islam dinigha étiqad qilidighan musulmanlarning ramizan mezgilidiki diniy pa'aliyetlirini qattiq cheklesh heqqide buyruq we belgilimilerning bolghanliqi, jümlidin ramizan rozisi tutushning özila “Terbiyelesh merkizi”ge bérishqa yétip ashqudek seweb bolidighanliqi heqqide türlük uchurlar tarqalmaqta.

Uyghurlar diyaridiki ramizanliq cheklimisi qattiq eyibliniwatqan, emma Uyghurlar diyarida ramizan rozisi heqqide söz qilishqimu imkan bolmaywatqan ehwalda béyjingdiki amérika elchixanisi özining tor bétide xitayche we Uyghurche yéziqlarda ramizanliq tilek élan qilghan. Bash elchi branstad namidin élan qilin'ghan bu tilekte ular özlirining barliq musulmanlargha qizghin salam yollaydighanliqini bildürüp: “Men bizning oxshimighan medeniyet we étiqadni hörmetleshtin we oxshimighan étiqadi bolush hoquqini qoghdashtin qandaq netijilerge érsheleydighanliqimiz toghruluq oylinip körüshimizni ümid qilimen. Ramizan mubarek!” deydu.

D u q mu Uyghurlar ramizan éyida duch kéliwatqan diniy bésimlar heqqide söz qilip, 16-may küni “Sherqiy türkistandiki ramizan cheklimiliri” serlewhilik bayanat élan qildi. Bayanatta xitay hökümitining yillardin buyan hökümet xizmetchiliri, oqughuchilar we oqutquchilarni ramizandin cheklep kéliwatqanliqi, emdilikte bolsa “Bir a'ile bolush” namida her bir Uyghur a'ilisige bir yaki birnechchidin xitay kadirni yétip-qopushqa orunlashturup, ramizanliq pa'aliyetlerni öylergiche nazaret qiliwatqanliqi eyiblen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.