Бейҗиңдики америка әлчиханисиниң хадимлири вирус сәвәбидин америкаға қайтишни тәләп қилған

Мухбиримиз әзиз
2022-01-26
Share

Хитай тәвәсидә йеңиваштин ямраватқан вирус юқуми түпәйлидин бейҗиңдики америка әлчиханисиниң хадимлири америка ташқий ишлар министирликидин әлчиханида хизмәт қиливатқан хадимлар вә улар бала-чақилириниң америкаға қайтип кетишигә рухсәт қилишни тәләп қилған. Әмма ташқий ишлар министирлики һазирчә бу тәләпни тәстиқлимиған.

CNN Агентлиқиниң 26-январдики хәвиридә ейтилишичә, таҗисиман вирусиниң “омикрон” вариянти бейҗиң шәһиридә ямраватқан болғачқа, әлчихана хадимлири хитай һөкүмитиниң қамал қилиш тәдбирлирини қоллиниши, буниң билән бир қисим балиларниң қамал бикар болғучә ата-анилиридин җуда болуш еһтимали барлиқидин әндишә қилған. Гәрчә хитай һөкүмити хитай тәвәсидики америка дипломатийә хадимлирини карантин мәзгилидә балилири билән биллә турушқа йол қойған болсиму, әмма хитай һөкүмитиниң һәрқачан бу бәлгилимини бикар қилиш еһтимали болғачқа, бир қисим ата-анилар юқуриқи тәләпни оттуриға қойған икән. Әлчихана хадимлиридин бири бу һәқтә сөз қилип: “биз ағрип қелиштин қорқуватқинимиз йоқ. Кишиләрниң әндишә қиливатқини омикрон вариянтиниң бәк тез юқидиғанлиқи һәмдә буниңға қарши бәкму қаттиқ болған тәдбирләрниң елиниш еһтимали,” дегән.

Хәвәрдә ейтилишичә, нөвәттә бейҗиң, шаңхәй қатарлиқ он чоң шәһәрдә омикрон вариянти байқалған. Америка һөкүмитиниң хитайда турушлуқ йеңи баш әлчиси николас бурнс әпәндиму ваба юқуми түпәйлидин бейҗиң сәпирини кечиктүрмәктә икән.

Хитай һөкүмити америка әлчиханисиниң бу һәқтики илтимасидин хәвәрдар болғандин кейин, буниңға наразилиқ билдүргән. Хитай ташқий ишлар министирликиниң баянатчиси җав лиҗйән бу һәқтә сөз қилип: “дөлитимизниң вабани контрол қилиш вә алдини елиш тәдбирлири илмий асасларға тайиниду. Биз чәт әлликләрни наһайити яхши қоғдиялаймиз” дегән. Әмма хитайдики ваба юқуми мәзгилидә мислисиз қаттиқ тәдбирләрниң елинғанлиқи һәмдә бу түпәйлидин көплигән сәлбий ақивәтләрниң келип чиққанлиқи тоғрисида көплигән учурлар мәлум болғанлиқтин, кишиләр хитай һөкүмитиниң бу қетимқи ваба юқумини қандақ бир тәрәп қилиши, шуниңдәк олимпик мусабиқисини қандақ өткүзүши тоғрисида изчил ғулғула қилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт