Amérikaning bashqurulidighan bomba sistémisining jenubiy déngiz qirghiqigha orunlashturulushi xitayni endishilendürgen

Washin'gtondin muxbirimiz uyghar teyyarlidi
2024.04.22

Xitay da'iriliri amérikaning bashqurulidighan bomba sistémisining jenubiy xitay déngizi qirghiqigha qaritip orunlashturulushidin endishe qilidighanliqini bildürüp, bashqurulidighan bomba sistémisining xitayning “Ishik aldigha” orunlashturushigha qet'iy qarshi turidighanliqini ipadiligen.

Amérikaning “Heptilik xewerliri” zhurnilining 2024-yili 4-ayning 19-künidiki xewirige asaslan'ghanda, xitay hökümiti peyshenbe küni amérikaning bashqurulidighan bomba sistémisining jenubiy xitay déngiz qirghiqigha orunlashturulushidin “Qattiq endishe” qilidighanliqini bildürgen. Shuning bilen bir waqitta xitay da'iriliri amérikaning bashqurulidighan bomba sistémisining jenubiy xitay déngizi qirghiqigha orunlashturulushining xitay zéminini zerbe bérish da'irisige kirgüzüshi mumkinchilikini otturigha qoyghan.

Melum bolushiche, amérikaning bashqurulidighan bomba sistémisi jenubiy déngizdiki xitay bilen déngiz teweliki mesilisidiki ixtilapliri künsayin küchiyiwatqan filippin'gha orunlashturulmaqchi bolghan.

Amérika armiyesi terep bu ay dawamlishiwatqan herbiy manéwirning bir qismi süpitide filippinning shimaligha ottura musapilik iqtidar ige bashqurulidighan bomba sistémisining orunlashturulushini “Tarixi ehmiyetke ige” dep maxtighan.

 “Teyféng borini” (Typhon) dep atilidighan bashqurulidighan bomba sistémisi ölchemlik bashqurulidighan bomba (the Standard Missile 6) we tomaxawk (Tomahawk) quruqluqqa hujum qilish bombisini öz ichige alidiken. Kéyinkisi yiraq musapilik bashqurulidighan bomba bolup, meshghulat musapisi 1609.344 Kilométirdin ashidiken. Bu bombilar jenubiy xitay déngizidiki xitay kontrolluqidiki rayonlargha shundaqla xitayning jenubiy déngiz qirghiqidiki herbiy bazilargha yétip baralaydiken.

Xitay tashqi ishlar ministirliqining bayanatchisi lin jyen béyjingda ötküzülgen qerellik muxbirlarni kütüwélish yighinida mundaq dégen: “Xitay amérikaning asiya-tinch okyan rayonigha ottura musapiliq bashqurulidighan bomba orunlashturushigha we shuningdek yene bir tereplime herbiy ewzellikke érishish üchün özining bashqurulidighan bomba sistémisini xitayning ishik aldigha orunlashturushigha qet'iy qarshi turidu”.

Amérika quruqluq armiyesi tinch okyan rayonining bayanatchisi kapitan riyan déboy (Capt. Ryan DeBooy) Ning éytishiche, bu orunlashturush “Bu yilqi manéwirning muhim mezmuni” bolup, “Filippinning déngiz mudapi'e iqtidarini yuqiri kötürüsh bilen bir waqitta, amérika-filippin ittipaqining öz'ara maslishishchanliqi we teyyarliqini kücheytidiken”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.