Amérika hökümiti filippinning xitaydin mudapi'e körüshige meblegh wede qildi

“Roytérs agéntliqi” ning 30-iyuldiki xewiride éytilishiche, amérika hökümiti filippinning herbiy we déngiz mudapi'e iqtidarini östürüshi, shu arqiliq künsayin ulghiyiwatqan xitay tehditige taqabil turushi üchün 500 milyon amérika dolliri yardem qilidighanliqini bildürgen. Amérika tashqi ishlar ministiri antoni bilinkén we amérika dölet mudapi'e ministiri loyid astin bu toghrisida manila shehride tégishlik kishiler bilen uchrashqandin kéyin bu yéngiliqni jakarlighan.

Amérika dölet mudapi'e ministiri loyid astin bu heqte söz qilip “Bu miqdardiki yardem tarixta misli körülmigen derijide bolup, bu hal öz nöwitide baydin hökümiti, amérika dölet mejlisi, shundaqla amérika xelqining filippinni qollaydighanliqini ochuq namayan qilidu” dégen. Bu hal amérika bilen qarshiliship xitaygha dost tartqan sabiq pirézidént rodrigo dutérto (Rodrigo Duterte)ning ornigha chiqqan férdinand markos (Ferdinand Marcos)ning amérika hökümitige yéqinlishish xahishi peyda qilghan ijabiy ilgirilesh, dep qaralghanliqi melum.

Melum bolushiche, xitay hökümiti izchil halda jenubiy xitay déngizidiki 90 pirsent térritoriyeni “Bizning tewelikimiz” dep dawa qiliwatqan bolup, mushu sewebtin bu déngiz boyidiki köpligen döletler, jümlidin filippin xitayning déngiz ighwagerchilikining eng chong hujum nishanigha aylinip qalghan. Shunga filippin hökümiti xitaydin mudapi'e körüsh üchün amérika bilen ittipaqliq ornitishni tallighan hemde filippin tewesidiki amérika herbiy bazisining 9 gha yétishige ruxset qilghan. Nöwette bu bazilardin üchi filippinning shimalida bolup, xitayning teywen'ge hujum qilishini tosushta muhim rol oynaydu, dep qaralmaqta.