Amérikaliq hindilar xitaygha qarshi pa'aliyet ötküzdi
2020.08.10
“Hindistan heqiqiti” torining xewer qilishiche, 9-awghust bir top amérikaliq hindilar amérika paytexti washin'gtondiki dölet mejlisi binasining aldigha yighilip, xitayning hindistan'gha tajawuz qilishi we Uyghur musulmanlirining kishilik hoquqini depsende qilishigha qarshi pa'aliyet ötküzgen.
Pa'aliyetchilerdin adapa parasat mundaq dégen: “Bu yil yazda pütün dunya korona wirusi bilen élishiwatqan chaghda xitay bashqa döletning zéminigha tajawuz qildi. Bu tajawuzchiliq hindistanning ladax rayonidila emes, bashqa qoshna döletlerdimu yüz berdi. Emdi dunyaning birliship xitay tajawuzchilirigha qarshi turidighan waqit keldi.”
Bu yil 5-maydin buyan xitay bilen hindistan ikki döletning chégra qoghdash qisimliri sherqiy ladax rayonida toqunushqan. 6-Ayning 15-künidiki toqunushta galwan wadisida soqush yüz bérip, 20 neper hindistanliq esker we namelum sanda xitay eskiri ölgenidi.
Amérika jumhuriyetchiler partiyisidin punit axluwaliya mundaq dégen: “Xitay kompartiyisi Uyghurlarning diniy erkinlikige, xongkongluqlarning kishilik erkinlikige tajawuz qildi. Biz xitayning afriqadiki we irandiki qilmishlirini körüwatimiz. Eng yamini, ular hindistan'gha arqidin zerbe bériwatidu. Xitay her türlük ijtima'iy taratqu epliri arqiliq sanliq melumat we uchur oghrilap, amérikaliqlar arisidimu jasusluq qiliwatidu.”
Washin'gton alahide rayonidin bu pa'aliyetke qatnashqan sunil sing, hindistan bash ministiri mudining xitay puqralirigha hindistan'gha kirish wizisi bermeslik usulini maxtighan. U yene hindistanliqlarning hazir xitay mehsulatlirini sétiwalmaydighanliqini, amérikaningmu mushundaq qilishi kéreklikini bildürgen.
Amérikaliq hindilarning bu qétimliq pa'aliyiti xitaygha qarshi ötküzgen 2-qétimliq eng chong pa'aliyiti iken.