Amérika hindistan bilen herbiy kélishim imzalap, dunyani xitay tehditidin agahlandurdi

Muxbirimiz erkin
2020-10-27
Share

Amérika hindistan bilen 27-öktebir yéngi délhida sün'iy hemra uchurlirini hembehirlishishni öz ichige alghan halqiliq bir herbiy kélishim imzalap, xitaygha küchlük signal bergen. Analizchilar bu kélishim xitayning rayondiki künséri küchiyiwatqan herbiy kéngeymichilikige taqabil turushni meqset qilghanliqini ilgiri sürmekte. Melum bolushiche, bu xil halqiliq sün'iy hemra uchuri basqurulidighan bomba, ademsiz ayrupilan yaki bashqa nishanlarni étip chürüsh üchün bek muhim iken.

"Tüp jughrapiyelik sanliq melumat almashturush we hemkarliq kélishimi" namliq höjjet amérika tashqiy ishlar ministiri mayk pompéyo, dölet mudapiye ministiri mark espér bilen hindistan tashqiy ishlar ministiri we dölet mudapiye ministiri otturisida imzalan'ghan. Mayk pompéyo bilen mark espér 26-öktebir "Amérika-hindistan istiratégiyelik diyalogi" gha qatnishish üchün yéngi délhigha kelgen. Roytérs agéntlirining xewer qilishiche, mayk pompéyo tönügün ikki döletning xitayning bixeterlik we erkinlikke élip kélidighan tehditige teng taqabil turushi kéreklikini bildürgen.

Mayk pompéyo: "Rehberlirimiz we puqralirimiz xitay kompartiyesining démokratiye, qanun bilen idare qilish, ochuq-ashkariliq yaki déngiz qatnash erkinliki, hindi-tinch okyanning asasi bolghan erkin, ochuq-ashkara güllinishke dost emeslikini téximu éniq körüp yetti," dégen. Dölet mudapiye ministiri mark espér mezkur kélishimni ikki dölet arisidiki herbiy hemkarliqni algha sürüshning "Muhim abidisi" dep tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet