Америка юникло (Uniclo) маркилиқ кийимләрни импорт қилишни чәклигән

Мухбиримиз җәвлан
2021-05-19
Share

Бломберг ториниң хәвәр қилишичә, америка таможниси бу йил 1-айда юникло маркилиқ кийимләрни биңтуәндики мәҗбурий әмгәк билән четишлиқ дәп бекитип, униң америка базириға киришини чәклигән. 5-Айниң 10-күни америка таможниси вә чегра бихәтәрлик идариси ашкарилиған бир һөҗҗәттә көрситилишичә, көп миқдардики юникло маркилиқ әрәнчә көйнәкләр лос-анжелис портида тосулуп қалған вә америка таможниси бу кийимләрни америка базириға қоюп бериш тәлипини рәт қилған.

Юникло японийәниң асия бойичә әң чоң кийим-кечәк сетиш ширкити болуп, америкада 47 сетиш орни бар икән. Америка таможниси бу ширкәтниң пахта хам әшясиниң шинҗаңдики биңтуәндин кәлмигәнликини испатлашни тәләп қилған. юникло ширкити хам әшяниң биңтуәндин кәлмигәнлики һәққидә испат бәргәнликини ейтқан, әмма америка таможниси бу учурларниң йетәрлик әмәсликини билдүргән. юникло ширкити америка таможнисиниң бу қараридин үмидсизләнгәнликини, мәһсулатлириниң американиң импорт өлчимигә тамамән уйғун икәнликини ейтқан. Бу ширкәт йәнә баянат берип, өзлиридә кишилик һоқуқ дәпсәндичиликини ениқлайдиған күчлүк бир механизм барлиқини, әгәр мәҗбурий әмгәк яки башқа кишилик һоқуқ дәпсәндичилики билән четишлиқ мал тәминлгүчи ширкәтни байқап қалса, улар билән сода мунасивитини дәрһал тохтитидиғанлиқини билдүргән.

Хәвәрдә билдүрүлүшичә, дунядики кийим-кечәк карханилириниң көпинчиси уйғур районидики пахта вә мәҗбурий әмгәк мәсилисигә бағлинип қалған болуп, хитай һөкүмити бир яқтин мәҗбурий әмгәкни инкар қилса, бир яқтин истемалчилирини күшкүртүп, мәҗбурий әмгәккә қарши туруватқан чәт әл маркилирини байқут қилишқа чақирған. Шундақтиму америка вә башқа ғәрб дөләтлири уйғур районидин келиватқан мәһсулатларни қаттиқ тәкшүрүш вә мәҗбурий әмгәккә четишлиқ болғанлиқини чәкләшни давам қилмақта икән. Бу вәзийәттә хитайниң дуня кийим-кечәк базирини монупул қилиш чүши асанлиқчә әмәлгә ашмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт