Amérika we kanada hökümetliri xitayning qanunsiz déngiz mehsulatlirini téximu qattiq chekleshke chaqirildi

Amérika awam palatasi tebi'iy bayliq komitétining re'isi ra'ul m. Grijalwa (Raul Grijalva) bashchiliqidiki bir qisim dölet mejlis ezaliri we bezi ammiwi teshkilatlar birlikte amérika we kanada hökümetliridin qanunsiz déngiz mehsulatlirigha bolghan tekshürüshni chingitishni telep qilghan.

“Déngiz mehsulatliri menbesi” namliq xewer torining 4-séntebirdiki obzorida körsitilishiche, yuqiridiki dölet mejlis ezaliri “Qanunsiz okyan qurulushi” namliq musteqil tetqiqat orgini 2023-yili 10-ayda élan qilghan doklatni alahide esletken. Shundaqla mushuninggha asasen amérika we kanada hökümetliridin tizimgha élinmastin qanunsiz dawam qiliwatqan hemde kishilik hoquq depsendichiliki bilen bulghan'ghan béliqchiliqni tosush, bundaq déngiz mehsulatlirining istémalchilargha yetküzülüshini cheklesh tedbirlirini yenimu kücheytishni telep qilghan.

 “Qanunsiz okyan qurulushi” teshkilati töt yilliq tekshürüshtin kéyin xitaydiki déngiz mehsulatlirini pishshiqlap ishlesh saheside Uyghur mejburiy emgek küchlirining yötkep ishqa séliniwatqanliqini éniqlap chiqqan idi. Shundin kéyin bu mesile küchlük diqqet qozghap, amérika tewesidiki déngiz mehsulatlirini import qilghuchi shirketler bu xitay shirketliri bilen bolghan alaqisini bikar qilghan. Amérika weten xewpsizliki ministirliqi bolsa “Uyghur mejburiy emgikining aldini élish qanuni” boyiche xitay déngiz mehsulatlirini qara tizimlikke qoshqan idi.

Dölet mejlisi ezaliri amérika tashqi ishlar ministirliqi, amérika emgek ministirliqi, yéza igilik ministirliqi, yémeklik we dora bashqurush idarisi qatarliq organlargha yazghan bu mektupta yene töwendiki so'allarni sorighan: “Tashqi ishlar ministirliqi hemde amérika tamozhna we chégra mudapi'e idarisi ‛Uyghur mejburiy emgikining aldini élish qanuni‚ gha asasen Uyghur mejburiy emgiki bilen bulghan'ghan déngiz mehsulatlirining amérikigha kirishini qandaq toxtatmaqchi? siler qandaq tedbirlerni qollanmaqchi?”