Général danford:“Amérikining küchi asiya-tinch okyan rayonida ajizlighini yoq!”

Muxbirimiz eziz
2018.02.06

Yéqinda amérikining asiya-tinch okyan rayonidiki tesir küchining ajizlaydighanliqi heqqidiki gep-sözler tarqalghandin kéyin 6-féwral küni amérika déngiz armiyesining générali joséf danford buninggha qattiq reddiye berdi.

Firansiye birleshme agéntliqining 6-féwraldiki xewiride éytilishiche général danford bu heqte söz qilip, “Shübhisizki beziler gherezlik halda amérikining asiya-tinch okyan rayonidiki küchi ajizlawatidu, dep pitne-pasat tarqatmaqta” dégen. Gerche u biwasite namini atimighan bolsimu, xewerde bu gepning xitaygha qaritiliwatqanliqi tilgha élinidu.

Général dunford yéqinda amérikining tinch okyandiki qisimlirini közdin kechürüsh üchün bir heptilik ziyaret boluwatqan bolup, uning tinch okyandiki ziyariti amérikining dölet mudapi'e ministiri jim mattis, dölet ishliri katipi réks tillérson we amérika prézidénti donald tramp qatarliqlarning tinch okyan ziyaritidin kéyin melum bolghan yene bir yuqiri derijilik ziyaret hésablinidiken.

Xewerde körsitilishiche, bu ziyaretlerning hemmisi xitayning bash kötürüshi bilen amérikining bu rayondiki mewjutluqining ajizlap qalmaydighanliqini namayan qilish üchün iken. Chünki asiya-tinch okyan rayoni ikkinchi dunya urushi mezgilidin tartipla amérikining rayon bixeterliki üchün muhim bolup kelmekte iken.

Melum bolushiche, yéqinda besh burjeklik bina yéngi dölet bixeterlik istratégiyesini élan qilghan hemde xitayni “Istratégiyelik riqabetchi” dep békitken idi. Shuning bilen birge xitayning öz etrapidiki qoshna memliketlerni bozek qiliwatqanliqini tekitligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.