Американиң фигура чиқирип муз тейилиш маһири хитайниң уйғурларға тутқан муамилисини “қорқунчлуқ” дегән

Американиң 2022-йиллиқ бейҗиң қишлиқ олимпикигә қатнишидиған җүп кишилик фигура чиқирип муз тейилиш маһири тимоти ледук, хитайниң уйғурларға тутқан муамилисини “қорқунчлуқ кишилик һоқуқ дәпсәндичилики” дәп көрсәткән. Темути ледук бейҗиң қишлиқ олимпикигә бир айдәк вақит қалған бир пәйттә, хитайниң уйғурларға “ирқий қирғинчилиқ” йүргүзүшигә қарита ашкара қарши ипадә билдүргән аз сандики олимпик тәнһәрикәтчиләрниң биридур.

Ледук, көп қисим тәнһәрикәтчиләр уйғурлар учраватқан қирғинчилиқ һәққидики соалларға ениқ җаваб бериштин өзини қачуруватқан, хәлқара олимпик комитети вә нурғун дөләтләр қишлиқ олимпикни байқут қилишни рәт қилип, хитайниң уйғур “ирқий қирғинчилиқи” ни йепишиға ярдәм бериш билән әйиблиниватқан бир вақитта бу сөзләрни қилған.

“бүгүнки америка” гезитиниң хәвәр қилишичә, ледук 9-январ америка командисиға талланғандин кейин мухбирлар униңдин хитайдики кишилик һоқуқ мәсилисини сориған. Ледук, “буниң җаваб бериш интайин мүшкүл бир соал” икәнлики вә униң “җаваби аддий әмәслики” ни билдүргән. У: “мениң дейәләйдиғиним, биз уйғурларниң бешиға кәлгән қорқунчлуқ ишларни етирап қилимиз. Алдинқи күнләрдә бир йәрдә оқудум, бу 2-дуня урушидин бери әң көп кишиниң йиғивелиш һәм әмгәк лагерлириға қамилишидур” дегән.

У йәнә “демәкчи болғиним, булар биз йүз бериватқанлиқини көрүп турған қорқунчлуқ кишилик һоқуқ дәпсәндичиликидур. Сиз у нәрсиләрни оқуғиниңизда өзиңизни наһайити чарисиз һес қилисиз, чүнки сиз ‛мән немә қилалаймән‚ дәп ойлайсиз” дегән. Мәлум болушичә, темути ледук америкалиқ йәнә бир маһир әшлей кәйин гребил билән биллә тунҗи қетим бейҗиң қишлиқ олимпикигә қатнишидикән.