Америка армийәси һиндистан армийәси билән бирликтә хитай чеграсиға йеқин егизликтә бирләшмә һәрбий маневир өткүзидикән

Мухбиримиз җәвлан
2022.08.08
Share on WhatsApp
Share on WhatsApp

CNN Ториниң хәвәр қилишичә, америка армийәси һиндистан билән хитай оттурисида талаш-тартишта қалған җайға 100 километирғиму кәлмәйдиған йәрдә һиндистан армийәси билән биллә һәрбий маневир өткүзидикән.

Һиндистан һәрбий тәрәпниң билдүрүшичә, бу маневир 10-айниң оттурисида өткүзүлидиған болуп, әскәрләр юқири егизликтә җәң қилиш мәшиқи елип баридикән. Маневир өткүзүлидиған җай һиндистанниң авли игизлики болуп, һиндистан билән хитай даим мушу җайни талишип чегра тоқунуши пәйда қилип кәлмәктикән.

2020-Йил 6-айда һиндистан билән хитай чегра мудапийә әскәрлири һималая теғидики чегра бойида тоқунушуп, 20 һиндистан әскири, 4 хитай әскири (хитайниң мәлумати) өлгәндин буян, һиндистан билән хитайниң мунасивити изчил җиддий болуп кәлгән. Һәр икки дөләт бу чеграға һәрбий күчини топлаватқан болуп, уруш пилтисигә от йеқилиш еһтимали һәр заман мәвҗут икән.

Хитай һөкүмити йәнә хитай-һиндистан чеграси бойиға җайлашқан пәнгоңсу көлигә көврүк селивалған болуп, америка армийәси тинч окян қисминиң қомандани чарлис флин (Charles Flynn): “хитайниң бу чегра бойлирида топлаватқан һәрбий күчи вә әслиһәлири кишини чөчүтиду,” дегән.

Һиндистан американиң һинду-тинч окян районида қурған “4 дөләт иттипақи” ниң муһим әзаси болуп, америка дөләт мудапийә миниситирликиниң баянатчиси бу қетимлиқ бирләшмә маневир һәққидә тохтилип: “әркин вә ечиветилгән һинду-тинч окян райони бәрпа қилиш бизниң нишанимиз,” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.