Америкидики бир журнал хитайниң уйғур районидики «йепиқ тәрбийиләш лагерлири» ни тәнқид қилди

Мухбиримиз әркин
2018-03-30
Елхәт
Пикир
Share
Принт

Америкидики бир тор журнили пәйшәнбә күни мақалә елан қилип, хитайниң он миңлиған уйғурни «йепиқ тәрбийиләш лагерлири» а йиғивалғанлиқи, уйғурларниң әң қаттиқ дәриҗидики бастурушқа учраватқанлиқини билдүрди.

«Дуня тор журнили» да елан қилинған «хитайниң қайта тәрбийиләш лагерлири» сәрләвһилик мақалидә йәнә «хитай даирилири уйғур бөлгүнчилирини террорлуқ һуҗум елип барди, дәп әйиплисиму, лекин нурғун кишиләр бейҗиңниң уйғур тәһдитини көптүрүп, уни өзиниң бу райондики бастурушиға баһанә қилип көрсәтмәктә,» дәп қарайдиғанлиқини билдүргән.

Мақалидә радиойимизниң хәвирини нәқил кәлтүрүп, қәшқәр вилайитиниң өзидә 120 миң уйғурниң «тәрбийиләш лагерлири» да тутуп турулуватқанлиқи, даириләрниң лагердики тутқунларни «вәтәнпәрвәрлик нахшилири» ни ейтишқа мәҗбурлап, тәшвиқатқа боғуватқанлиқи, «ши җинпиңниң идийиси» ни өгинишни тәләп қиливатқанлиқини тәкитлигән.

Мақалидә йәнә бейҗиң бу лагерларниң мәвҗутлуқини ашкара елан қилмиған болсиму, лекин униңда бир милйондәк уйғурниң тутуп турулуватқанлиқиниң пәрәз қилиниватқанлиқи билдүрүлгән. Мақалидә һөкүмәт биналири, мәктәпләрниң «тәрбийиләш лагерлири» ға өзгәртилгәнлики, даириләрниң тутқунларни бу лагерларға әвәтип турсиму, лекин уларниң аилилиригә уқтуруш қилмайдиғанлиқи, бәзи лагерларда тутқунларниң янчилап ухлайдиғанлиқи, бәзи тутқунларниң қаттиқ соғуқлардиму аяқсиз соланғанлиқи илгири сүрүлгән. Мақалидә йәнә «кишилик һоқуқ көзитиш тәшкилати» ниң баянати нәқил кәлтүрүлүп, «хитай, уйғур хәлқиниң тәнқиди пикирләрни қилиши, өзиниң миллий, диний кимликини тинч вә қорқмай ипадилишигә йол қоюши керәк,» дейилгән.

Пикирләр (0)
Share
Толуқ бәт