Америкидики уйғур тәшкилати ақ сарайниң алдида йиғилиш өткүзүп, лагердики уйғурларни қоюп беришни тәләп қилиду

Мухбиримиз әркин
2018-06-18
Share

Америка уйғур бирләшмиси вә уйғур кишилик һоқуқ қурулуши ақ сарайниң алдида шам йеқип, йиғивелиш лагерлиридики уйғурларни қоюп беришни тәләп қилидиғанлиқини елан қилди.

Америкидики мәзкур икки уйғур тәшкилати дүшәнбә күни елан қилған баянатида, америкидики уйғурларни 22-июн җүмә күни кәч саәт 7:30 дә ақ сарайниң алдидики лафайет бағчисида өткүзүлидиған мәзкур паалийәткә қатнишишқа чақирди.

Баянатта, бу паалийәт арқилиқ “хитайниң йиғивелиш лагерлирида халиғанчә тутуп турулуватқан бир милйондин артуқ уйғурни хатириләшкә вә уларға һәмдәмдә болушқа” чақирған. Бәзи хәлқара мутәхәссисләр хитай һөкүмитиниң нөвәттә 1 милйон 100 миңдин артуқ уйғурни бу лагерларда һечқандақ қануни рәсмийәтсиз тутуп туруватқанлиқини илгири сүрмәктә.

Бәзи гуваһчиларниң дәлиллишичә, бу лагерларниң қаттиқ башқуруш түзүми, еғир психологийәлик бесим, лагерларниң начар тамақ вә тазилиқ шараити өлүм-йетимниң көпийишини кәлтүрүп чиқармақта икән.

Уйғур кишилик һоқуқ тәшкилатлири әгәр бу лагерларниң дәрһал тақилип, униңдики тутқунлар дәрһал қоюп берилмисә кәң көләмлик өлүм-йетим вәқәлирини пәйда қилидиғанлиқини агаһландуруп кәлди. Лекин хитай һөкүмити һазирға қәдәр бу лагерларниң мәвҗутлуқини вә униңға соланған уйғурларниң конкрет санини ашкара етирап қилип бақмиди.

Йеқинда америкидики бәзи уйғур яшлар дөләт мәҗлисиниң алдида 2 айлиқ марафончә наразилиқ билдүрүш һәрикити башлиған иди. Америка уйғур бирләшмиси вә уйғур кишилик һоқуқ қурулуши дүшәнбә елан қилған баянатида йәнә, хитайниң аталмиш бу “қайта-тәрбийәләш лагерлири” ға уйғур җәмийитидики нопузлуқ шәхсләр вә шундақла адәттики авам пуқраларни һечқандақ җинсий вә яш пәрқигә қаримай солиғанлиқини тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт