Amérikidiki Uyghur teshkilati aq sarayning aldida yighilish ötküzüp, lagérdiki Uyghurlarni qoyup bérishni telep qilidu

Muxbirimiz erkin
2018.06.18
Share on WhatsApp
Share on WhatsApp

Amérika Uyghur birleshmisi we Uyghur kishilik hoquq qurulushi aq sarayning aldida sham yéqip, yighiwélish lagérliridiki Uyghurlarni qoyup bérishni telep qilidighanliqini élan qildi.

Amérikidiki mezkur ikki Uyghur teshkilati düshenbe küni élan qilghan bayanatida, amérikidiki Uyghurlarni 22-iyun jüme küni kech sa'et 7:30 de aq sarayning aldidiki lafayét baghchisida ötküzülidighan mezkur pa'aliyetke qatnishishqa chaqirdi.

Bayanatta, bu pa'aliyet arqiliq “Xitayning yighiwélish lagérlirida xalighanche tutup turuluwatqan bir milyondin artuq Uyghurni xatirileshke we ulargha hemdemde bolushqa” chaqirghan. Bezi xelq'ara mutexessisler xitay hökümitining nöwette 1 milyon 100 mingdin artuq Uyghurni bu lagérlarda héchqandaq qanuni resmiyetsiz tutup turuwatqanliqini ilgiri sürmekte.

Bezi guwahchilarning delillishiche, bu lagérlarning qattiq bashqurush tüzümi, éghir psixologiyelik bésim, lagérlarning nachar tamaq we taziliq shara'iti ölüm-yétimning köpiyishini keltürüp chiqarmaqta iken.

Uyghur kishilik hoquq teshkilatliri eger bu lagérlarning derhal taqilip, uningdiki tutqunlar derhal qoyup bérilmise keng kölemlik ölüm-yétim weqelirini peyda qilidighanliqini agahlandurup keldi. Lékin xitay hökümiti hazirgha qeder bu lagérlarning mewjutluqini we uninggha solan'ghan Uyghurlarning konkrét sanini ashkara étirap qilip baqmidi.

Yéqinda amérikidiki bezi Uyghur yashlar dölet mejlisining aldida 2 ayliq marafonche naraziliq bildürüsh herikiti bashlighan idi. Amérika Uyghur birleshmisi we Uyghur kishilik hoquq qurulushi düshenbe élan qilghan bayanatida yene, xitayning atalmish bu “Qayta-terbiyelesh lagérliri” gha Uyghur jem'iyitidiki nopuzluq shexsler we shundaqla adettiki awam puqralarni héchqandaq jinsiy we yash perqige qarimay solighanliqini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.