Америка дөләт мәҗлиси қармиқидики хитай ишлири иҗраийә комитетиниң рәислири алмашти

Мухбиримиз әзиз
2019-04-17
Елхәт
Пикир
Share
Принт

Америка авам палатасиниң рәиси нәнси пелоси бүгүн авам палата әзаси җим мәкговернни америка дөләт мәҗлиси қармиқидики хитай ишлири иҗраийә комитетиниң рәисликигә тәйинлиди. Буниңға мунасип һалда кеңәш палатасиниң рәиси мич мәкконнел кеңәш палата әзаси марко рубйони мәзкур комитетниң қошумчә рәисликигә тәйинлиди.

Җим мәкговерн өзиниң вәзипә тапшурувелиш сөзидә инсан һәқлири мәсилисиниң америка ташқи сияситидә мәркизий темилардин болуши лазимлиқини, бу һәқләрниң һәрқандақ вақитта һәрқандақ җайда қоғдилиши лазимлиқини алаһидә тәкитлиди. Шуниңдәк «хитай һөкүмитиниң барғансери яманлишип меңиватқан инсан һәқлири хатирисигә һәмдә бу һални ташқи дуняға кеңәйтиш урунушиға қарита көзимизни юмувалмастин, әксичә буниң сориқини қилишимиз лазим» дәп көрсәтти.

Хитай ишлири иҗраийә комитетиниң алдинқи қарарлиқ рәиси, америка кеңәш палатасиниң әзаси марко рубйо өзиниң бундин кейин давамлиқ һалда җим мәкговерин билән бирликтә хизмәт қилиштин толиму бәхт һес қиливатқанлиқини билдүрүш билән биргә, уйғурлар мәсилисиниму алаһидә тилға алди. У бу мунасивәт билән қилған сөзидә «хитай һөкүмитиниң қанун арқилиқ идарә қилиш вә инсан һәқлири саһәси бойичә қиливатқан дәпсәндичилики, болупму хитай һөкүмитиниң бир милйондин артуқ уйғур вә башқа мусулманларни лагерларға қамивелишиға охшаш бир қатар қилмишлирини чәкләш үчүн давамлиқ өз тиришчанлиқимни көрситимән,» деди.

Мәлум болушичә, америка дөләт мәҗлиси қармиқидики хитай ишлири иҗраийә ишлири комитети 2000-йили қурулған болуп, хитайниң инсан һәқлири, қанун арқилиқ идарә қилиш саһәсидики әһваллирини назарәт қилишқа мәсул икән. Мәзкур комитет һәр йили америка президентиға вә америка дөләт мәҗлисигә йиллиқ доклат тапшуридикән. Шуниңдәк мәзкур комитетниң сиясий җинайәтчиләр санданиға хитай һөкүмити түрмигә ташлиған сиясий мәһбусларниң исимлики киргүзүлидикән.

Мәзкур комитетниң әзалиқиға авам палата әзалиридин тоққуз киши, кеңәш палата әзалиридин тоққуз киши, юқири дәриҗилик һәйәт хадимлиридин бәш киши бекитилгән болуп, һәрқайси палатаниң рәислири бирдин комитет рәисини бекитидикән. Бу рәисләр бирликтә мәзкур комитетниң рәислик вәзиписини ада қилидикән.

Пикирләр (0)
Share
Толуқ бәт