Amérika dölet mejlisi qarmiqidiki xitay ishliri ijra'iye komitétining re'isliri almashti

Amérika awam palatasining re'isi nensi pélosi bügün awam palata ezasi jim mekgowérnni amérika dölet mejlisi qarmiqidiki xitay ishliri ijra'iye komitétining re'islikige teyinlidi. Buninggha munasip halda kéngesh palatasining re'isi mich mekkonnél kéngesh palata ezasi marko rubyoni mezkur komitétning qoshumche re'islikige teyinlidi.

Jim mekgowérn özining wezipe tapshuruwélish sözide insan heqliri mesilisining amérika tashqi siyasitide merkiziy témilardin bolushi lazimliqini, bu heqlerning herqandaq waqitta herqandaq jayda qoghdilishi lazimliqini alahide tekitlidi. Shuningdek “Xitay hökümitining barghanséri yamanliship méngiwatqan insan heqliri xatirisige hemde bu halni tashqi dunyagha kéngeytish urunushigha qarita közimizni yumuwalmastin, eksiche buning soriqini qilishimiz lazim” dep körsetti.

Xitay ishliri ijra'iye komitétining aldinqi qararliq re'isi, amérika kéngesh palatasining ezasi marko rubyo özining bundin kéyin dawamliq halda jim mekgowérin bilen birlikte xizmet qilishtin tolimu bext hés qiliwatqanliqini bildürüsh bilen birge, Uyghurlar mesilisinimu alahide tilgha aldi. U bu munasiwet bilen qilghan sözide “Xitay hökümitining qanun arqiliq idare qilish we insan heqliri sahesi boyiche qiliwatqan depsendichiliki, bolupmu xitay hökümitining bir milyondin artuq Uyghur we bashqa musulmanlarni lagérlargha qamiwélishigha oxshash bir qatar qilmishlirini cheklesh üchün dawamliq öz tirishchanliqimni körsitimen,” dédi.

Melum bolushiche, amérika dölet mejlisi qarmiqidiki xitay ishliri ijra'iye ishliri komitéti 2000-yili qurulghan bolup, xitayning insan heqliri, qanun arqiliq idare qilish sahesidiki ehwallirini nazaret qilishqa mes'ul iken. Mezkur komitét her yili amérika prézidéntigha we amérika dölet mejlisige yilliq doklat tapshuridiken. Shuningdek mezkur komitétning siyasiy jinayetchiler sandanigha xitay hökümiti türmige tashlighan siyasiy mehbuslarning isimliki kirgüzülidiken.

Mezkur komitétning ezaliqigha awam palata ezaliridin toqquz kishi, kéngesh palata ezaliridin toqquz kishi, yuqiri derijilik hey'et xadimliridin besh kishi békitilgen bolup, herqaysi palataning re'isliri birdin komitét re'isini békitidiken. Bu re'isler birlikte mezkur komitétning re'islik wezipisini ada qilidiken.