Pakistan hökümiti amérikigha jiddiy naraziliq bildürdi

Muxbirimiz eziz
2018.01.02

Amérika prézidénti donald tramp yéqinda pakistan hökümitini “Yalghanchiliq we aldamchiliq” ta eyibligendin kéyin pakistan hökümiti buninggha jiddiy naraziliq bildürgen.

“Munber” gézitining 2-yanwardiki xewirige qarighanda, amérika hökümiti pakistan'gha bérilmekchi bolghan 255 milyon amérika dolliriliq herbiy yardemni tonglitip qoyghan. Aq saray bu heqte chüshenche bérip: “Pakistanning térrorluqqa qandaq inkas bildürüshi bu yardemning teqdirini belgileydu” dégen.

Melum bolushiche, amérika prézidénti donald tramp bu mesile heqqide tiwéttérda uchur yollap: “Biz ötken 15 yilda pakistan'gha 33 milyard amérika dolliriliq yardem bergen bolsaqmu pakistan bizni izchil aldap keldi. Pakistan térrorluqqa ünümlük zerbe bermigenliki üchün hazir pakistan térrorchilarning jenniti bolup qalmaqta” dégen.

Roytérs agéntliqining2-yanwardiki xewiride éytilishiche, 1-yanwar küni pakistan tashqi ishlar ministirliqi amérikining pakistanda turushluq bash elchisi deyl xalni chaqirtip, donald tramp yollighan uchur heqqide chüshenche bérishni telep qilghan. Pakistanning tashqi ishlar ministiri xoja muhemmed asif muxbirlarni kütüwélish yighinida qilghan sözide “Pakistanning amérikining yardimisizmu küni ötiwéridighanliqi” ni éytqan.

Xewerde éytilishiche, pakistanning qoshnisi afghanistan bu heqte bayanat élan qilip, donald trampning “Heqiqetni éytqanliqi” ni ilgiri sürgen. Afghanistan hökümitining sözchisi général dölet weziri “Pakistan héchqachan térrorluqqa qarshi pa'aliyetlerge küch qoshqini yaki uninggha ishtirak qilghini yoq” dégen. Melum bolushiche, beziler “Amérikining bu qarari pakistanni xitay terepke téximu égildürüshi mumkin” déyishmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.