Америка пакистанға берилидиған бихәтәрлик ярдимини тохтатти

Америка һөкүмити алдинқи күни баянат елан қилип, пакистанниң талибанларға қарши кәскин һәрикәт елип бармиғанлиқини, шу вәҗидин пакистанға берилидиған 250 милйон доллар бихәтәрлик ярдимини тохтатқанлиқини елан қилди.

Америка дөләт ишлири министирлиқиниң баянатчиси һейзер неюрт пәйшәнбә күнидики ахбарат елан қилиш йиғинида қилған сөзидә, гәрчә америка тәрәп пакистан һөкүмити билән юқири дәриҗиликләр сөһбити елип барған болсиму, лекин “талибанлар вә һәққаний гуруһи давамлиқ түрдә пакистанға йошурунуп, афғанистанға бузғунчилиқ қилиш, америка вә униң иттипақдашлириға һуҗум қилиш һәрикити билән шуғуллинип кәлди,” дегән.

Һейзер нюртниң тәкитлишичә, пакистан юқириқи гуруһларға қарши “кәскин һәрикәт” қолланмиғичә, америка һөкүмити пакистанға берилидиған бихәтәрлик ярдимини тохтитип туридикән.

Игилинишичә, америкиниң пакистанға беридиған бихәтәрлик ярдимини тохтитиши дәл америкиниң пакистанни 2018‏-йиллиқ “диний әркинлик вәзийити алаһидә көзитилидиған әлләр тизимликидики дөләт”, дәп җакарлиған охшаш бир күндә йүз бәрди.

Америка дөләт ишлири министирлиқи алдинқи күни елан қилған тизимликкә хитайниму киргүзгән иди.

Америка һөкүмити пакистанға берилидиған 250 милйон доллар ярдәмни тохтитиштин бир қанчә күн аввал президент доналд трамп америкиниң пакистанға йеқинқи 15 йил ичидә 33 милярд доллар ярдәм бәргән болсиму, лекин америкиниң һечнемигә еришәлмигәнликини билдүргән. У, пакистанни “ялғанчилиқ вә сахтипәзлик” билән әйибләп, пакистанниң афғанистандики террорчиларни макан билән тәминләватқанлиқини тәкитлигән иди.

Лекин чәтәл ахбарат васитилириниң қәйт қилишичә, бәзи көзәткүчиләр “америкиниң һәрикити пакистанни хитайға техиму йеқинлаштуруветиши мумкин,” дәп көрсәткән. Көзәткүчиләрниң илгири сүрүшичә, пакистан бир тәрәптин “афғанистандики террорчиларға ян таяқ болуп”, йәнә бир тәрәптин, хитай билән “шәрқий түркистан ислам һәрикити” гә қарши зич һәмкарлишип кәлгән.