Amérika parlamént ezaliri xitayda yémeklik bixeterliki mesilisining hel bolmaydighanliqini bildürdi

22-May küni amérika dölet mejliside échilghan “Xitaydiki yémeklik we dorilarning bixeterlik mesilisi yumilaq üstel yighini” da, amérika parlamént ezaliri söz qilip, xitay hökümitining xitaydiki yémeklik bixeterliki mesilisini hel qilalmaydighanliqini bildürdi.

Amérika awazining xewiridin melum bolushiche, bu qétimqi yighin'gha amérika démokratlar partiyisining parlamént ezasi boran riyasetchilik qilghan. U sözide “Eger amérikiliqlar, özliri hem yaxshi köridighan ermek haywanliri istémal qiliwatqan yémeklik we dorilarning köp qismining xitaydin kéliwatqanliqini bilse, ular choqum chöchüydu. Biz istémal qiliwatqan béliqlarning 80% i, alma sherbitining 50% i we samsaqning 30% i xitaydin kirgen. Halbuki, xitayda yémeklik bixeterliki mesilisi barghanche éghirlashmaqta. Amérika tamozhnisining agahlandurushigha uchrighan yémeklik shirketlirining 74 i xitay shirketliri”dégen.

Yighin'gha teklip bilen qatnashqan, amérika dölet mejlisi tashqi munasiwetler komitéti yer shari sehiye tetqiqat ornining yuqiri derijilik tetqiqatchisi, xu'ang yenjung söz qilip “Eger xitayda ishlen'gen süpetsiz yémekliklerge qarita jiddiy tedbir qollanmisa, bu xil yémeklikler amérikadiki istémalchilirining salametlikigila tehdit élip kelmestin, belki pütkül yer shari ahalisige xewp élip kélidu” dégen. Xu'ang yenjung bundin 10 yil ilgiri xitayda saris késili tarqalghan mezgildimu, amérika dölet mejlisige kélip ispat bergen idi.