Америка пирезиденти җов байдин норузни тәбрикләп баянат елан қилди

Вашингтондин мухбиримиз уйғар тәйярлиди
2024.03.21

“ақсарай тори” (The White House) ториниң 2024-йили 3-айниң 19-күнидики мәхсус хәвиригә асасланғанда, америка пирезиденти җов байдин дунядики норуз байримини тәбрикләйдиған хәлқләрни тәбрикләп баянат елан қилған.

Баянатта мундақ дейилгән: “бүгүн, мән вә ханимим иккимиз дунядики милйонлиған кишиниң ойғиниш, өзини йеңилаш вә қайтидин җанлиниш күни болған норузни тәбрикләймиз. Дөлитимиздики норуз әһли бир йәргә җәм болуп бу байрамни тәбриклигәндә вә уни америка мәдәнийитидики хушаллиқниң бир қисмиға айландурғанда, у америка роһини әкс әттүриду һәм бизгә үмид беғишлайду” .

Хитайдики әһвал буниң әксичә болуп, 2017-йилдин буян, уйғурларниң роза һейт, қурбан һейтқа охшаш диний байрамлирини өткүзүши, һәтта норузға охшаш иран вә түркий хәлқләргә ортақ болған байрамлирини тәбрикләшму чәкләнгәниди. Әмма хитай миллитиниң әнәниви байрамлиридин болған чаған, панус байрими, дегәндәк байрамларниң хитай һөкүмитиниң тәшвиқати, һәтта мәҗбурлиши астида уйғур елидә омумлишишқа йүзләнгәнлики мәлум.

Йеқинда радийомиз хитай даириләр уйғурларни чағанлиқ паалийәтләргә кәң-көләмдә қатнаштуруш үчүн риғбәтләндүрүш билән қорқутуш тәдбирини тәң қолланғанлиқини дәлиллигәниди.

Мутәхәссисләр вә кишилик һоқуқ тәшкилатлири уйғурларниң әнәниви байрамлириниң чәклинип, хитай байрамлирини өткүзүшкә мәҗбурлинишини “мәдәнийәт қирғинчилиқи” ниң бир қисми дәп баһалиғаниди.

Норуз байрими уйғурларниң әнәниви баһар байрими болуп, күн билән түн тәңләшкән 3-айниң 21-, 22-күнигә тоғра келиду. Бу баһарниң йәни кона йилниң ахирлишип йеңи йилниң башланғанлиқидин дерәк бериду. Шуңа у “йеңи күн” дәпму аталған. Нөвәттә муһаҗирәттики уйғурлар бу байрамни һәр хил шәкилләрдә тәбрикләп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.