Америка башчилиқидики төт дөләтниң хитайға қарши қаттиқ тәдбирләрни алидиғанлиқи илгири сүрүлди

Мухбиримиз әркин
2018-02-05
Елхәт
Пикир
Share
Принт

Америка, австралийә, японийә, һиндистан қатарлиқ 4 дөләтниң җәнубий деңизда хитайға қарши бәзи ортақ тәдбирләрни алидиғанлиқи илгири сүрүлди. «Америка авази» радиосиниң хәвәр қилишичә, юқириқи 4 дөләт бу йил баянат елан қилиш, деңизда хитайға рәқиб дөләтләргә ярдәм бериш, ихтилаптики деңиз йоллирида ортақ һәрбий маневир өткүзүш қатарлиқ васитиләрни қоллинишни пиланлимақта икән.

«Америка авази» ниң хәвиридә, хитайниң җәнубий деңиздики һәрбий әслиһәлиригә биваситә хирис қилишниң орниға юқириқидәк тәдбирләр арқилиқ униңға тақабил туруш мумкинлики билдүрүлгән. Хәвәрдә ашкарилинишичә, юқириқи 4 дөләтниң башлиқлири өткән йили 11‏-айда манилада көрүшкәндә җәнубий деңизниң қатнаш әркинликини қандақ қоғдашни музакирә қилған. Хәвәрдә йәнә юқириқи дөләтләрниң бу йил җәнубий деңизда һәрбий һәрикитини көпәйтидиғанлиқи, «бу дөләтләрниң америка билән һәрбий һәмкарлиқни көрүнәрлик күчәйтиши хитайға күчлүк сигнал беридиғанлиқи» билдүрүлгән. Хәвәрдә баян қилинишичә, хитайға тақабил турушниң йәнә бир тәдбири бу райондики дөләтләргә қорал-ярақ сетип берип, уларниң һәрбий күчини күчәйтиш икән. Бирләшмә агентлиқниң дүшәнбә күни хәвәр қилишичә, америка дөләт ишлири министирлиқиниң қорал-ярақ содисиға мәсул дипломати, баш әлчи тина кайданоф шәрқий җәнубий асиядики һөкүмәтләрни қорал-ярақ сетивелип, өзини қоғдашқа риғбәтләндүридиғанлиқини билдүргән. У, бу сөзни сингапорда өткүзүлгән хәлқара һава көргәзмиси мунасивити билән мухбирларниң телефон зияритини қобул қилғанда дегән. Кайданоф сөзидә, шәрқий-җәнубий асиядики дөләтләрни америкиниң «F-35 типлиқ уруш айропиланиға охшаш қоралларни сетиливелишиға барлиқ амаллар билән риғбәтләндүримиз», дегән. Хитай көлими 5.3 Милйон квадрат километирлиқ җәнубий деңизниң мутләқ көп қисмида игилик һоқуқ барлиқини елан қилип, бу райондики бәзи аралларға һәрбий әслиһәләрни орунлаштурған. Бу шу әтраптики дөләтләрниң әндишисини қозғапла қалмай, хәлқара әркин деңиз қатнишиға хирис пәйда қилған иди.

Пикирләр (0)
Share
Толуқ бәт