Америка қораллиқ қисимлар мулазимәт комитети әзалири уйғурларға қилиниватқан зулумни "ирқий қирғинчилиқ" дәп елан қилишни тәләп қилди

Мухбиримиз ирадә
2021-01-14
Share

Америка дөләт мәҗлиси қармиқидики "қораллиқ қисимлар мулазимәт комитети" ниң җумһурийәтчиләр партийәсидин болған әзалириниң америка ташқий ишлар министирлиқидин хитайниң уйғур елидики зулумини "ирқий қирғинчилиқ" дәп рәсмий бекитишини тәләп қиливатқанлиқи мәлум болди.

Америкадики "вашингтон әркинлик көрсәткүчиси" гезити юқириқи комитет әзалириниң ташқий ишлар минситирлиқиға бу һәқтә йоллиған тәләпнамисини көргән болуп, комитит әзалири чаршәнбә күни йоллиған тәләпнамисида мундақ дегән:

"хитай коммунистик партийәси шинҗаңдики уйғур мусулманлириға қарши зораванлиқ, қийнаш, тутуп туруш, мәҗбурий туғмас қилиш вә қул қилиш қатарлиқ системилиқ вә кәң көләмлик һәрикәтләрни йүргүзүватиду. Униң һәрикити бу хәлқни түптин яки қисмән йоқитиш муддиасини әкис әттүриду."

"вашингтон әркинлик көрсәткүчиси" ниң ейтишичә, авам палата әзаси җим банкис вә җов вилсон "барғансери көпийиватқан дәлил-испатлар хитай һөкүмитиниң уйғур мусулманлирини җаза лагерлириға солаш вә уларни қул әмгәкчиләргә айландуруш арқилиқ ирқий қирғинчилиқ қиливатқанлиқини көрситип бериду," дегән.

Авам палатасиниң җумһурийәтчи әзалири банкис вә вилсон йәнә америка ташқий ишлар министирлиқиниң районда йүз бериватқанларни ирқий қирғинчилиқ, дәп бәлгилиши үчүн йетәрлик дәлил-испат бар, дәп қарайдиғанлиқини әскәртип: "хитай һөкүмити уйғур хәлқини қәстән өлтүрүш, қийин-қистаққа елиш, қолға елиш қатарлиқлар арқилиқ уйғурларни түптин вә қисмән вәйран қилидиған шараитни яратти," дегән.

Мәлум болушичә, америка ташқий ишлар министирлиқи нөвәттә уйғурларға қаритилған бу зиянкәшликниң характерини рәсмий йосунда бекитип чиқиш үчүн хизмәт қиливатқан болуп, уларға бу һәқтә қилиниватқан чақириқларму күнсайин көпәймәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт