Tramp-putin söhbitide xitay mesilisi otturigha qoyulghan

Muxbirimiz eziz
2018-07-16
Share

Amérika prézidénti donald tramp bilen rusiye prézidénti wiladimir putin 16-iyul küni finlandiyening paytexti xélsinkida söhbetleshti.

Söhbet axbarat sahesidin mexpiy tutulghanliqi üchün hazirche söhbetning konkrét mezmuni éniq emes. Söhbettin kéyinki axbarat élan qilish yighinida donald tramp bu heqte söz qilip "Biz köpligen mesililerni muzakirileshtuq.

Soda ishliri, herbiy ishlar, yadroluq qorallar mesilisi, shuningdek xitay we xitaygha da'ir bir qisim mesililerni muhakime qilduq" dégen.

"Nyu-york waqti géziti" ning 16-iyuldiki xewiride éytilishiche, amérika prézidénti donald tramp rusiyening amérika saylam ishlirigha arilashqanliqini inkar qilidighan pakitlarning barliqini, özining bu pakitlargha ishinidighanliqini bildürgen. Söhbette xitay mesilisining alahide tilgha élin'ghanliqigha qarap beziler buning yéqinda bashlan'ghan amérika-xitay soda urushi bilen alaqisi bolushi mumkin, dep texmin qilmaqta.

Xitay mesilisining yéngiwashtin otturigha chiqishi amérika herbiy sahesidimu tégishlik inkas qozghighan. Birleshme agéntliqning xewiride éytilishiche, téksas shtatida yéngidin teshkillen'gen amérika armiyesining bash qomandanliq shtabi xitay we rusiyening amérika üchün eng zor tehdit bolidighanliqini algha sürgen.

Mezkur qomandanliq shtabining rehberliridin général mark milléy "Ötken 16 yilda amérika armiyesi iraq we süriye qatarliq jaylardiki qoralliqlargha qarshi aldirash bolup ketkende xitay we rusiye özlirining herbiy quwwitini ashuruwaldi. Amérika armiyesi emdi xaraktéri özgiriwatqan urushlargha taqabil turushqa teyyarlinishi lazim" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet