Америка-русийә мунасивәтлириниң өзгириши хитайни биарам қилди

Мухбиримиз әркин
2018-07-17
Share

Америка президенти доналд трамп билән русийә президенти владимир путин дүшәнбә күни финландийә пайтәхти һелсинкида учришип, икки тәрәп мунасивитини өзгәртишкә келишкәнликини елан қилди.

Президент трамп путин билән өткүзгән ахбарат йиғинида, америка-русийә мунасивәтлириниң һечқачан һазирқидәк начарлишип бақмиғанлиқи, һәр икки тәрәпниң хаталиқ өткүзгәнлики, бирақ бу әһвалниң һазир өзгәргәнликини җакарлиди.

Хәлқара анализчиларниң илгири сүрүшичә, русийә-америка мунасивәтлиридики өзгириш русийә-хитай мунасивәтлирини тәвритип қойидикән. Дүшәнбә күни америкидики "консериватип америка" торида елан қилинған бир мақалида, америка билән русийәниң хитайға қарши иттипақлишиватқанлиқи илгири сүрүлди.

Америкидики ақиллар амбири - "дөләт мәнпәәти мәркизи" мудапиә программисиниң директори харий казианис қәләмгә алған мақалида, америка билән русийәниң хитайға қарши иттипақлишишиға йетәрлик сәвәбләрниң барлиқи әскәртилип, "русийә билән америка бир-бири билән дүшмәнлишип меңивәрсә, хитай иқтисадиниң бир күни америка билән русийәниң йиғиндисидин ешип кетидиғанлиқи, иқтисади күч һәрбий күчкә айланса қандақ ишларниң йүз беридиғанлиқи һәммигә мәлум икәнликини тәкитлигән.

Көзәткүчиләрниң билдүрүшичә, америка-русийә мунасивитиниң өзгириши вә бу һәқтики анализлар хитайни биарам қилишқа башлиған. Хитай ташқи ишла министирлиқи баянатчиси хва чүнйиң сәйшәнбә күни буниңға инкас билдүрүп, хитайниң "хитай-русийә истратегийәлик шериклик мунасивитигә болған ишәнчи камил.

Хитай-русийә мунасивәтлири һәрқандақ ташқи амилниң тәсиригә учримайду" дегән. Лекин харий казианисниң илгири сүрүшичә, һазир русийә хитай билән достәк қилсиму, лекин кәлгүсидә у хитайниң бир йол бир бәлвағ пилани, қорал-ярақ риқабити вә земин мәсилилиридә җиддий хирисиға дуч келидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт