Һиларий килинтон билән доналд тирамп тунҗи муназирисидә хитайни 12 қетим тилға елиши диққәт қозғиди

Мухбиримиз меһрибан
2016-09-27
Елхәт
Пикир
Share
Принт

Америкида демократлар партийисиниң президент намзати һиларий килинтон билән җумһурийәтчиләр партийисиниң президент намзати доналд трампниң 26- сентәбир кәчтә өткүзүлгән тунҗи қетимлиқ йүзму-йүз муназирисидә өз-ара кәскин бәс-муназирә қилиши хәлқара таратқуларниң диққитини қозғиди.

Әнглийә б б с агентлиқиниң бу һәқтики хәвиридә көрситилишичә, демократларниң президент намзати һиларий килинтон вә җумһурийәтчиләр президент намзати доналд тирамп, нөвәттә америкилиқлар көңүл бөлүватқан, америкидики пул-муамилә, иқтисад, ишқа орунлишиш, интернет бихәтәрлики, шималий корейә мәсилиси қатарлиқларни һәл қилишта өз иқтидариниң қарши тәрәптин үстүнлүкини ипадиләш үчүн, америкиниң хитай сияситигә мунасивәтлик әһвалларни баян қилип, хитай дөлитиниң намини 12 қетим нәқил алған.

Мәсилән, хәвәрдә нәқил елинишичә, доналд трамп демократлар партийиси һакимийәт тутқан мәзгилдики америкиниң пул-муамилә вә иқтисади һәққидә тохтилип, америкидики чоң ширкәтләрниң әрзан әмгәк күчи қоғлишип, завутларни хитайға йөткиши америкидики ишсизлиқ нисбитини ашурувәтти, дәп тәнқидлигәнлики вә әгәр өзи президент болса бу әһвални тамамән өзгәртидиғанлиқини билдүргән.

Һиларий клинтон болса, демократлар партийиси һакимийәт тутқан мәзгилдә америкиниң хитайға қаратқан тавар експортиниң 50% ешип, иқтисадниң яхшиланғанлиқи вә америкилиқлар үчүн техиму көп иш пурсәтлири яритилғанлиқини тәкитлигән.

Доналд трамп йәнә америкиниң интернет бихәтәрлики мәсилисиниму тилға елип, америка ширкәтлири һәтта һөкүмәт органлири бу йилларда үзлүксиз һалда хитай хаккерлириниң һуҗумиға учриған болсиму, әмма демократлар партийиси рәһбәрликидики америка һөкүмитиниң бу мәсилиләрни кәскин бир тәрәп қилмиғанлиқини тәнқидлигән.

У йәнә һиларий клинтонниң елхәт сәтчилики қатарлиқларниму тилға елип, әгәр өзи президент болса һазир сақлиниватқан мәсилиләрни техиму кәскин вә җиддий тәдбир билән өзгәртидиғанлиқини билдүргән.

Пикирләр (0)
Share
Толуқ бәт