Amérika soda wekili: "Amérika qanuni Uyghur mejburiy emgek mehsulatlirining import qilinishini chekleydu"

Muxbirimiz erkin
2020-06-18
Élxet
Pikir
Share
Print

Amérika soda wekili robért laytxayzér 17-iyun küni muxbirlarning jaza lagérliridiki Uyghur we bashqa musulmanlarning xitay karxanilirida mejburiy emgekke sélinip ishlepchiqiriliwatqan mehsulatlar heqqidiki so'allirigha jawab bérip, amérika qanunining mejburiy emgek bilen ishlengen mehsulatlarning amérikagha kirgüzülüshini chekleydighanliqini bildürgen. Uning tekitlishiche, amérika hökümiti mejburiy emgek mehsulatlirini cheklesh toghrisidiki amérika qanunlirini "Qattiq ijra qilidiken".

Laytxayzér bu sözlerni prézidént tramp "Uyghur kishilik hoquq siyasiti qanuni" gha imza qoyghan shundaq amérika tamozhna we chégra qoghdash idarisi xotenning lop nahiyesidiki "Méyshin chach mehsulatliri shirkiti" ning chach mehsulatlirining amérikagha import qilinishini chekligenlikini élan qilghan küni qilghan. Radiyomiz ilgiri mezkur shirketning chach mehsulatlirigha lagérdiki Uyghurlarning chéchini ishlitiwatqanliqini delilligen. Mezkur uchur amérika tamozhna we chégra qoghdash idarisining "Méyshin shirkiti" ishlepchiqarghan chach mehsulatlirini cheklishige türtke bolghan idi.

Lékin roytérs agéntliqining bildürüshiche, laytxayzér yene bu yil 1-ayda imzalan'ghan amérika-xitay 1-basquchluq soda kélishimining mejburiy emgek mesilisini öz ichige almaydighanliqi, mewjut amérika qanunlirining mejburi emgek mehsulatlirini import qilishni chekleydighanliqini bildürgen. Laytxayzer bu sözlerni amérikada xitay hökümiti bilen birliship, lagérdiki Uyghur tutqunlarni mejburiy emgekke séliwatqan xitay karxanilirini jazalash sadaliri küchiyiwatqan bir mezgilde qildi.

Toluq bet