Хитай, тәйвән вәкиллириниң трумпниң президентлиқ қәсәм мурасимиға қатнишишиға қарши чиққан

Мухбиримиз ирадә
2017-01-19
Елхәт
Пикир
Share
Принт

Америка президентлиқ сайлиминиң ғалиби доналд трумп җүмә күни қәсәм берип президентлиқ вәзиписини рәсмий тапшурувалиду.

Пайтәхт вашингтонда өткүзүлидиған мурасим алдида хитай даирилири америкидин тәйвәнлик вәкилләрниң бу мурасимға қатнаштурулмаслиқини тәләп қилған. Хитай ташқи ишлар баянатчиси хуа чүнйиң чаршәнбә күнидики баянатида «биз америкини тәйвәнниң мурасимға вәкил әвәтишигә рухсәт қилмаслиққа чақиримиз» дегән вә бу тәлипини рәсмий йоллар арқилиқ трумпниң хизмәт гурупписиға вә һазирқи һөкүмәт даирилиригә йоллиғанлиқини билдүргән.

«Вашингтон почтиси» гезитиниң хәвәр қилишичә, тәйвәнниң сабиқ баш министири йү шикүн башчилиқидики бир һәйәт дүшәнбә күни америкиға қарап йолға чиққан. Бу һәйәт ичидә һазирқи һөкүмәт бешидики партийә болған демократийә тәрәққият партийиси вә өктичи партийә вәкиллириму бар болуп, улар мурасимға қатнашқандин сирт, бир қисим сиясәтчиләр, академикләр вә чәтәлләрдики хитай тәшкилат вәкиллири биләнму учришиш елип баридикән.

Бирақ, хуа чүнйиң сөзидә әскәртип: « биз тәйвәнниң америка - хитай мунасивәтлиригә хилап һәрқандақ шәкилдики һәрикитигә қәтий қарши туримиз» дегән. Фирансийә агентлиқиниң ейтишичә, өмәк башлиқи йү шикүн хитайға җаваб қайтуруп хитайниң кичик дөләт психикисида иш қиливатқанлиқини билдүргән. У шундақла хитай дөләт рәиси ши җинпиңни има қилип туруп « һазирғичә хитайда бундақ каллиси аддий бир лидер чиқип бақмиған иди» дегән.

Доналд трумп сайламда ғәлибә қилғандин кейин тәйвән президенти сәй йиңвенниң тәбрик телефонини қобул қилған вә шундақла америкиниң «бир җуңго сияситигә бағлинип қелиш зөрүрийити йоқ» дегән сөзни қилиш арқилиқ хитайниң чишиға тәгкән иди. Шундин бери икки тәрәп арисида тәйвән мәсилиси давамлиқ һалда талаш - тартиш қилинип кәлмәктә.

Пикирләр (0)
Share
Толуқ бәт