Amérika-teywen alaqilirini kücheytishke da'ir qanun layihesining maqullinishi xitayni bi'aram qildi

Igilinishiche, amérika kéngesh palatasi aldinqi küni amérika-teywen alaqilirini kücheytishke da'ir bir qanun layihisini maqullighan bolup, bu xitayni qattiq bi'aram qilghan.

Roytérs agéntliqining xewirige qarighanda, xitay tashqi ishlar ministirliqining bayanatchisi xu'a chünying peyshenbe künidiki bayanatida buni “Bir junggo siyasitige xilap,” dégen. U sözide xitay hökümitining mezkur qanun layihesige qet'iy qarshi turidighanliqini we bu heqtiki ipadisini alliqachan amérika terepke yetküzgenlikini bildürgen.

Amérika kéngesh palatasi charshenbe küni, teywen bilen amérikining her derijilik dölet emeldarlirining öz-ara bérish-kélish qilishi we shundaqla teywenning medeniyet we iqtisad sahesidikilerning amérikida tijaret qilishigha yol achidighan “Teywen sayahet qararnamisi” ni maqullighan idi.

Mezkur qararname bu yil 1-ayda amérika awam palatasining maqullishidin ötüp bolghan. Emdi 3-basquchta, bu qararning resmiy ishqa kirishishi üchün amérika prézidénti donald tramp imza qoyushi kérek iken.