Amérika bilen teywenning diplomatik munasiwetlirini kücheytishi xitayni bi'aram qildi

Amérikining yéqindin buyan teywen bilen bolghan diplomatik alaqilirini kücheytishi xitayni qattiq bi'aram qilghan. Xitay tashqi ishlar bayanatchisi lukang 27-may, düshenbe künidiki bayanatida amérika hökümitini teywen bilen bolghan alaqilirini üzüshke chaqirghan.

CNN Téléwiziyesining xewiridin qarighanda, yéqinda, teywenning döletlik xewpsizlik kéngishi re'isi dawid li washin'gton'gha yétip kélip, amérika döletlik xewpsizliki meslihetchisi jon bolton bilen körüshken. Bu, 1979-yilidin kéyin ikki terepning dölet bixeterlikige alaqidar yuqiri derijilik emeldarlirining tunji qétim uchrishishi bolup hésablinidiken.

Uning aldida yeni 25-may shenbe küni, teywen özining amérikida gheyriy resmiy elchixanisi süpitide xizmet élip bériwatqan “Shimaliy amérika ishliri hemkarliq kéngishi” namliq ishxanisining ismini amérika terep bilen ötküzgen söhbettin kéyin resmiy halda “Teywenning amérika qoshma shtatliri kéngishi” dep özgertkenlikini jakarlighan idi. CNN Ning éytishiche, bumu amérika bilen teywenning isimlirining teywenning resmiy bir organining nami süpitide tunji qétim birge qollinilishiken.

Xitay tashqi ishlar bayanatchisi lukang bolsa amérika-xitay munasiwetlirining “Bir junggo” siyasiti üstige qurulghanliqini eskertip: “Biz ikki junggo qurush yaki bir teywen we junggo shekillendürüsh urunushlirigha qet'iy qarshi turimiz” dégen.

Halbuki, teywenning herbiy ishlar bayanatchisi général chén chungchi amérika-teywen arisidiki diplomatik munasiwetlerning bundin kéyin dawamliq tereqqiy qilidighanliqini bildürgen.

CNN Ning éytishiche, bu général sözide, teywenning xuddi amérikigha oxshash erkinlik, démokratiye we kishilik hoquqtin ibaret yadroluq qimmet qarishigha ige ikenlikini tekitlep: “Biz asiya tinch okyan rayonida tinchliqning qoghdighuchisi bolushni arzu qilimiz. Bu amérika we teywen her ikki terepning menpe'etige uyghun” dégen.

Seyshenbe küni yene, teywen armiyesi özining yilliq herbiy manéwirini bashlighan. Bu, xitayning bolghusi tajawuzigha taqabil turush meqset qilin'ghan manéwir bolup, teywen prézidénti sey yingwén F-16V tipliq küreshchi ayropilanlarning meshiqini biwasite körgen. Teywendiki yüzligen amma kochilargha chiqip, teywen bayriqini lepilditip öz armiyesige medet bergen.