Америка билән тәйвәнниң дипломатик мунасивәтлирини күчәйтиши хитайни биарам қилди

Мухбиримиз ирадә
2019-05-28
Share

Америкиниң йеқиндин буян тәйвән билән болған дипломатик алақилирини күчәйтиши хитайни қаттиқ биарам қилған. Хитай ташқи ишлар баянатчиси лукаң 27-май, дүшәнбә күнидики баянатида америка һөкүмитини тәйвән билән болған алақилирини үзүшкә чақирған.

CNN Телевизийәсиниң хәвиридин қариғанда, йеқинда, тәйвәнниң дөләтлик хәвпсизлик кеңиши рәиси давид ли вашингтонға йетип келип, америка дөләтлик хәвпсизлики мәслиһәтчиси җон болтон билән көрүшкән. Бу, 1979-йилидин кейин икки тәрәпниң дөләт бихәтәрликигә алақидар юқири дәриҗилик әмәлдарлириниң тунҗи қетим учришиши болуп һесаблинидикән.

Униң алдида йәни 25-май шәнбә күни, тәйвән өзиниң америкида ғәйрий рәсмий әлчиханиси сүпитидә хизмәт елип бериватқан "шималий америка ишлири һәмкарлиқ кеңиши" намлиқ ишханисиниң исмини америка тәрәп билән өткүзгән сөһбәттин кейин рәсмий һалда "тәйвәнниң америка қошма штатлири кеңиши" дәп өзгәрткәнликини җакарлиған иди. CNN Ниң ейтишичә, буму америка билән тәйвәнниң исимлириниң тәйвәнниң рәсмий бир органиниң нами сүпитидә тунҗи қетим биргә қоллинилишикән.

Хитай ташқи ишлар баянатчиси лукаң болса америка-хитай мунасивәтлириниң "бир җуңго" сиясити үстигә қурулғанлиқини әскәртип: "биз икки җуңго қуруш яки бир тәйвән вә җуңго шәкилләндүрүш урунушлириға қәтий қарши туримиз" дегән.

Һалбуки, тәйвәнниң һәрбий ишлар баянатчиси генерал чен чуңчи америка-тәйвән арисидики дипломатик мунасивәтләрниң бундин кейин давамлиқ тәрәққий қилидиғанлиқини билдүргән.

CNN Ниң ейтишичә, бу генерал сөзидә, тәйвәнниң худди америкиға охшаш әркинлик, демократийә вә кишилик һоқуқтин ибарәт ядролуқ қиммәт қаришиға игә икәнликини тәкитләп: "биз асия тинч окян районида тинчлиқниң қоғдиғучиси болушни арзу қилимиз. Бу америка вә тәйвән һәр икки тәрәпниң мәнпәәтигә уйғун" дегән.

Сәйшәнбә күни йәнә, тәйвән армийәси өзиниң йиллиқ һәрбий маневирини башлиған. Бу, хитайниң болғуси таҗавузиға тақабил туруш мәқсәт қилинған маневир болуп, тәйвән президенти сәй йиңвен F-16V типлиқ күрәшчи айропиланларниң мәшиқини биваситә көргән. Тәйвәндики йүзлигән амма кочиларға чиқип, тәйвән байриқини ләпилдитип өз армийәсигә мәдәт бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт