Amérikaning teywen bilen herbiy ziyaretni eslige keltürüsh éhtimalliqi xitayni bi'aram qildi

Muxbirimiz irade
2017-12-14
Élxet
Pikir
Share
Print

Amérika prézidénti donald tramp teywen'ge munasiwetlik bir yéngi qanun'gha imza qoyghandin kéyin xitay derhal buninggha naraziliq bildürdi.

Roytérs agéntliqining xewer qilishiche, xitay tashqi ishlar ministirliqining bayanchisi lü kang peyshenbe künidiki sözide amérikani xitayning ichki ishlirigha arilishish bilen eyibligen.

Yéqinda xitayning bir yuqiri derijilik diplomati söz qilip, eger amérikaning urush paraxoti teywen ariligha yéqinlashsa, xitayning buninggha qarap turmaydighanliqini, urush qozghap teywenni bésiwalidighanliqini éytqan. Buning bilen teywen-xitay munasiwetliri yenimu jiddiyleshken. Düshenbe küni xitayning küreshchi ayropilanliri teywen arili üstide charlash we uchush meshiqi élip bérip, özining herbiy küchini köz-köz qilghan. Biraq teywen hökümiti bu heqtiki bayanatida "Teywen özining mudapi'e küchige ishinidu. Biz xitay ayropilanlirining bu herbiy meshiqige téz sür'ette jawab qayturimiz," dégen.

Aldinqi küni amérika prézidénti donald tramp amérika bilen teywen déngiz armiye paraxotlirining bir-birini ziyaret qilishini mumkinchilikke ige qilidighan 2018-yilliq "Dölet mudapi'esi hoquq bérish qarari" namliq bir qanun'gha imza qoyghan. Xitay bayanatchisi lü kang, amérikaning bu herikitining "Bir xitay siyasiti" ni depsende qilghanliq bolidighanliqini we béyjing hökümitining amérikigha resmiy yollar arqiliq naraziliq bildüridighanliqini éytqan.

Melum bolushiche, eger amérika-teywen déngiz armiyeliri arisida bundaq bir ziyaret emeliyleshse, bu 1979-yilidin buyanqi ikki terep armiyeliri otturisidiki eng chong alaqe bolup qalidiken.

Toluq bet